დიდი ბრიტანეთის ადგილობრივ არჩევნებში კონსერვატორებმა გაიმარჯვეს

დიდ ბრიტანეთში გამართულ ადგილობრივი თვითმმართველობის არჩევნებში მმართველმა პარტიამ გაიმარჯვა. BBC-ის ცნობით,  კონსერვატორებმა ქვეყნის მუნიციპალურ საბჭოებში 500 კანდიდატი გაიყვანეს დ დამატებით 11 ქალაქის წარმომადგენლობით ორგანოებზე კონტროლი დაამყარეს. ეს ბოლო 40 წლის განმავლობაში დიდი ბრიტანეთის ხელისუფლებაში მყოფი პარტიისთვის ყველაზე დიდი მიღწევაა.

ლეიბორისტებმა და დიდი ბრიტანეთის დამოუკიდებლობის პარტიამ ამ არჩევნებზე მნიშვნელოვანი მარცხი განიცადა. ლეიბორისტებმა იმ მუნიციპალიტეტებში დაკარგეს ხმების უმრავლესობა, რომლებსაც ათეული წლები აკონტროლებდნენ. მარცხი განიცადეს ასევე ლიბერალ-დემოკრატებმა (UKIP), რომელიც ტრადიციულად მესამე პარტიაა ქვეყანაში.

შოტლანდიაში ადგილობრივმა ნაციონალისტებმა გაიმარჯვეს.

არჩევნების შედეგების გამოცხადების შემდეგ დიდი ბრიტანეთის პრემიერმინისტრმა ტერეზა მეიმ აღნიშნა, რომ ეს შედეგი საპარლამენტო არჩევნებისთვის მზადების წინაპირობაა. მან კონსერვატიული პარტიის წევრებს აქტიურობისკენ, მოსახლეობას კი 8 ივნისის ვადამდელ არჩევნებზე ხმის მიცემისკენ მოუწოდა. ლეიბორისტთა ლიდერმა ჯერემი კორბინმა კი ადგილობრივი არჩევნების შედეგებზე განაცხადა, რომ იმედგაცრუებულია.

ექსპერტ-სოციოლოგ ჯონ კერტისის პროგნოზით, ამ ეტაპზე კონსერვატორებს ბრიტანელების 38% ემხრობა, ლეიბორისტებს 27%, ლიბერალ-დემოკრატებს 18%, ხოლო „დამოუკიდებლებს“ 5%. ექსპერტი საპარლამენტო არჩევნებში კონსერვატორების გამარჯვებას ელოდება.

5 მაისს, ბრიტანეთის თვითმმართველობის არჩევნებში მოქალაქეებმა ხმა მისცეს ხელისუფლების 88 რეგიონულ, ქალაქის და ადგილობრივ ორგანოში 4851 ადგილისთვის მებრძოლ კანდიდატებს. ინგლისში 34 ადგილობრივი ორგანოა, შოტლანდიაში - 32 საბჭო, უელსში - 22 საბჭო. 

18 აპრილს, ტერეზა მეიმ, ვადამდელი საპარლამენტო არჩევნები 8 ივნისისთვის დანიშნა და გადაწყვეტილება იმით ახსნა, რომ Brexit-ის პროცესში ბრიტანეთს მაღალი ლეგიტიმაციის მთავრობა სჭირდება. ამ მიზეზით, პროცედურის თანახმად, 3 მაისს დიდი ბრიტანეთის პარლამენტი დაითხოვეს.