ასადი: ტრამპი აშშ-ის ისტორიაში საუკეთესო პრეზიდენტია

სირიის პრეზიდენტმა ბაშარ ასადმა დონალდ ტრამპს აშშ-ის ისტორიაში საუკეთესო პრეზიდენტი უწოდა. ინფორმაციას ამის შესახებ სირიის სახელმწიფო საინფორმაციო სააგენტო ავრცელებს. 

„ტრამპი აშშ-ის ისტორიაში საუკეთესო პრეზიდენტია, ოღონდ არა იმიტომ, რომ კარგ პოლიტიკას ატარებს, არამედ იმიტომ რომ ყველაზე გამჭვირვალე პრეზიდენტია. აშშ-ის პრეზიდენტები პოლიტიკურ მკვლელობებსა უკვეთავენ და ყველა სახის კრიმინალს ჩადიან, თუმცა მიუხედავად იმისა მშვიდობის დარგში ნობელის პრემიას იღებენ და მსოფლიოში ადამიანთა უფლებების და უნიკალური ამერიკული ფასეულობების დამცველებად წარმოაჩენენ თავს.

სინამდვილეში ეს არის კრიმინალთა ჯგუფი, რომლებიც ამერიკული კომპანიების, ნავთობკომპანიებისა და შეიარაღების მწარმოებელი კორპორაციების ინტერესებს ატარებენ. ტრამპი პირდაპირ ამბობს, რომ მას მხოლოდ ნავთობი აინტერესებს“, - განაცხადა ასადმა.

მისივე თქმით, სირია არ მონაწილეობდა „ისლამური სახელმწიფოს“ ლიდერის აბუ ბაქრ ალ-ბაღდადის ლიკვიდაციის ოპერაციაში, როგორც ამას ტრამპი ამტკიცებდა.

„ჩვენ ამ ოპერაციის შესახებ მედიიდან შევიტყვეთ. შესაძლოა, ტრამპმა იფიქრა, რომ თუ მეტ ქვეყანას დაასახელებდა, ეს ინფორმაციას უფრო დამაჯერებლობას შესძენდა. აშშ-ს სურთ წარმოაჩინონ, რომ ისინი ებრძვიან ტერორიზმს. ჩვენ ეს არ გვჭირდება, ჩვენ რეალურად ვებრძვით ტერორიზმს. არანაირი ურთიერთობა და კონტაქტი ამერიკულ უწყებებთან არ გვქონია. მეტიც, რეალურად ჩვენ არ ვიცით, ჩატარდა თუ არა საერთოდ ეს ოპერაცია. რადარებზე თვითმფრინავები არ დაფიქსირებულა. რატომ არ გვაჩვენეს აქამდე ალ-ბაღდადის ცხედარი?“ - აღნიშნა სირიის პრეზიდენტმა.

27 ოქტომბერს აშშ-ის პრეზიდენტმა, დონალდ ტრამპმა დაადასტურა, რომ „ისლამური სახელმწიფოს“ ლიდერი ალ-ბაღდადი ჩრდილოეთ სირიაში სამხედრო ოპერაციისას მოკლეს. თეთრ სახლში გამართულ პრესკონფერენციაზე ამერიკის პრეზიდენტმა თქვა, რომ ალ-ბაღდადიმ თავი აიფეთქა და შედეგად თავისი სამი შვილიც მოკლა. ამასთან ერთად, ტრამპმა ოპერაციაში ხელშეწყობისთვის მადლობა რუსეთს, ერაყს, სირიას, თურქეთსა და ქურთებს გადაუხადა.

მანამდე ოპერაციაში ეჭვი რუსეთმაც შეიტანა, 31 ოქტომბერს კი ალ-ბაღდადის ლიკვიდაცია „ისლამურმა სახელმწიფომ“ დაადასტურა, პენტაგონმა კი ოპერაციის ამსახველი ვიდეომასალა გაავრცელა.

ვინ იყო სირიაში მოკლული აბუ ბაქრ ალ-ბაღდადი, შეგიძლიათ წაიკითხოთ ამ ბმულზე.