კიმ ჩენ ინი მთა „პექტუსანისკენ“ მიემართება

თითქმის ორი თვის შემდეგ მედიაში ისევ გავრცელდა ჩრდილოეთ კორეის ლიდერის, თეთრი ცხენით მოჯირითე კიმ ჩენ ინის ფოტოები. ამის შესახებ ინფორმაციას BBC ავრცელებს.

ფოტოები მთა „პექტუსანისკენ“ მიმავალ გზაზე, ჯირითობას ასახავს, რაც კიმ ჩენ ინისთვის სიმბოლურია. მის ამ საქციელს ყოველთვის მოსდევს მნიშვნელოვანი განცხადებები. ფოტოებზე ის მეუღლესთან და უმაღლეს სამხედრო თანამდებობის პირებთან ერთად არის გადაღებული. 

მთაზე ცხენებით ბოლო გასეირნების პარალელურად მედიაში ვრცელდება ინფორმაცია, რომ თვის ბოლოს კიმ ჩენ ინი მმართველ პარტიას შეხვდება, სადაც „ქვეყნის შიგნით და გარეთ შეცვლილ ვითარებას“ განიხილავს. თუმცა კიმ ჩენ ინს არ დაუკონკრეტებია ზუსტად რა საკითხებზე ისაუბრებს.

კიმ ჩენ ინმა აშშ-ს ბირთვული მოლაპარაკებების გადასარჩენად მეტი დათმობებისთვის ვადა წლის ბოლომდე მისცა. სამშაბათს, ჩრდილოეთ კორეის საგარეო საქმეთა მინისტრის მოადგილემ განაცხადა, რომ აშშ-მა უნდა აირჩიოს, რა სახის "საშობაო საჩუქარს" მიიღებს ფხენიანისგან. 

KCNA-ს ცნობით, კიმმა მთაზე ასვლამდე "რევოლუციური ბრძოლის ადგილებზე" მოათვალიერა.

მთა „პექტუსანს“ ქვეყნის იდენტობის ჩამოყალიბებაში დიდი როლი უჭირავს. ის ჩრდილოეთ კორეის გერბზეც არის გამოსახული და კიმ ჩენ ინის მამის, კიმ ჩენ ირის დაბადების ადგილად მიიჩნევა.

5 ოქტომბერს ცნობილი გახდა რომ აშშ-სა და ჩრდილოეთ კორეას შორის მოლაპარაკებები ჩაიშალა. დონალდ ტრამპი და კიმ ჩენ ინი  ერთმანეთს პირველად 2018 წლის 12 ივნისს, სინგაპურში შეხვდნენ. სამიტის ფარგლებში ხელი მოეწერა შეთანხმებას, რითაც ფხენიანმა კორეის ნახევარკუნძულის ბირთვული განიარაღების ვალდებულება აიღო. მოლაპარაკებების განახლებაზე ტრამპი და კიმ ჩენ ინი 2019 წლის ივნისში, ჩრდილოეთ და სამხრეთ კორეის საზღვარზე ხანმოკლე შეხვედრაზე შეთანხმდნენ, თუმცა ეს აქამდე არ მომხდარა.