თეთრ სახლში უარყოფენ ინფორმაციას იმის შესახებ, თითქოს ტრამპმა ასანჟს შეწყალების სანაცვლოდ გარიგება შესთავაზა

თეთრმა სახლმა კატეგორიულად უარყო ინფორმაცია იმის თაობაზე, რომ დონალდ ტრამპმა ასანჟს შეწყალების სანაცლოდ გარიგება შესთავაზა.

„პრეზიდენტი არც კი იცნობს დანა რორაბაკერს. პრეზიდენტმა მხოლოდ ის იცის, რომ რორაბაკერი ყოფილი კონგრესმენია. ტრამპს არასოდეს უსაუბრია მასთან ამ თემაზე, ისევე როგორც ნებისმიერ სხვა თემაზე. Guardian-ის ეს პუბლიკაცია სრული ფაბრიკაციაა და ტყუილი. სავარაუდოს, ეს მორიგი ფალსიფიკაციაა დემოკრატიული პარტიის ეროვნული კომიტეტიოს მხრიდან“, - განაცხადა აშშ-ს პრეზიდენტის პრესმდივანმა სტეფანი გრიშემმა. 

მანამდე Guardian-მა დაწერა, რომ დონალდ ტრამპმა ჯულიან ასანჟს შეწყალება შესთავაზა, თუ ის იტყოდა, რომ რუსეთს კავშირი არ ჰქონდა.

ბრიტანული გამოცემის ცნობით, ამის შესახებ დღეს ასანჟის ადვოკატმა სასამართლო სხდომაზე განაცხადა, სადაც მისი ექსტრადირების საკითხის ტექნიკური მოსმენა გაიმართა.

ადვოკატმა სასამართლოს მტკიცებულებაზე მიუთითა, რომლის თანახმად, ყოფილი რესპუბლიკელი კონგრესმენი დანა რორაბახერი 2017 წლის აგვისტოს ასანჟს შეხვდა, როდესაც ის ჯერ კიდევ ეკვადორის საელჩოში იმყოფებოდა.

შეხვედრის დროს მან ასანჟს განუცხადა, რომ პრეზიდენტი ტრამპის დავალებით მოქმედებდა და შეწყალებას სთავაზობდა ან რამე სხვა გამოსავალს, თუ ასანჟი იტყოდა, რომ რუსეთს კავშირი არ ჰქონდა „დემოკრატიული პარტიის“ ელექტრონული წერილების გამოქვეყნებასთან.

ასანჟი ლონდონში ეკვადორის საელჩოში 2019 წლის 11 აპრილს დააკავეს. მან საელჩოს თავი 2012 წელს შეაფარა, მას შემდეგ, რაც დიდი ბრიტანეთის სასამართლომ შვედეთისთვის მის გადაცემაზე გადაწყვეტილება მიიღო. აშშ-ში მიმდინარეობს გამოძიება 2016 წლის არჩევნებში რუსეთის ჩარევის შესახებ, რომელშიც WikiLeaks-ი და ასანჟიც ფიგურირებენ. არსებობს ეჭვები ასანჟის კრემლთან კავშირების თაობაზეც.

WikiLeaks-ის დამფუძნებელი ჯულიან ასანჟი ცნობილი გახდა გამოქვეყნებული პუბლიკაციებით, რომელიც ავღანეთსა და ერაყში აშშ-ის სამხედრო ოპერაციებს შეეხებოდა. 2010 წელს მისი პერსონით აშშ-ის ხელისუფლება დაინტერესდა. ასანჟი შვედეთში ჩავიდა, თუმცა მხარდაჭერა ვერ მიიღო.