ევროკომისარი: თუ მგზავრი საფრთხის შემცველად იქნება შეფასებული, შესაძლოა მას ევროკავშირში შესვლაზე უარი ეთქვას

ევროკავშირის შიდა საქმეთა კომისარის, ილვა იოჰანსონის განცხადებით, თუ მგზავრს ექნება სიმპტომები და ეს საფრთხის შემცველად იქნება შეფასებული, მაშინ შესაძლოა მას უარი ეთქვას ევროკავშირში შემოსვლაზე.

„ჩვენი, როგორც პასუხისმგებლიანი პოლიტიკოსების ვალია, როგორმე მოვახერხოთ კორონავირუსის გავრცელების შემცირება და დავიცვათ ჩვენი მოქალაქეები. ამ მიზნის მისაღწევად ყველა საჭირო ზომას გამოვიყენებთ. ჩვენ უნდა შევთანხდეთ მოქმედების გეგმაზე და ეს არის მთავარი საზრუნავი. ჩვენ ვმსჯელობთ იმაზე, თუ როგორ დავეხმაროთ ერთმანეთს და გვქონდეს მეტი კოორდინაცია. მნიშვნელოვანია საზღვრებთან დაკავშირებული საკითხების მენეჯმენტი. ჩვენი ყველა მცდელობა უნდა იყოს პროპორციული, ოპერატიული და ეფექტიანი“, - აცხადებს ილვა იოჰანსონი.

მისივე თქმით, წევრი ქვეყნების უმრავლესობამ ევროკომისიას დახმარება სთხოვა.

„ჩვენ ვაპირებთ წარმოვადგინოთ მოქმედების გეგმა, რაც იქნება დაკავშირებული სასაზღვრო საკითხების ეფექტიან მენეჯმენტთან. რაც შეიძლება სწრაფად უნდა იყოს ეს გეგმა მზად. ამ გეგმის თანახმად, ჩვენ მივცემთ რეკომენდაციებს წევრ სახელმწიფოებს, როგორ იმოქმედონ და რა სახის ზომებს მიმართონ. მესამე ქვეყნებიდან მოქალაქეების შემოსვლა ისედაც ექვემდებარება კონტროლს და შესაძლოა დაემატოს სამედიცინო შემოწმება. თუ მგზავრს ექნება სიმპტომები და საფრთხის შემცველად იქნება ეს შეფასებული, მაშინ შესაძლოა მას უარი ეთქვას ევროკავშირში შემოსვლაზე. ბევრ შემთხვევაში უკეთესია მათი საკარანტინო ზონაში გადაყვანა და სამედიცინო დახმარების გაწევა, მაგრამ საზღვრის გადაკვეთაზე უარის თქმაც არის ერთ-ერთი შესაძლებლობა. რაც შეეხება შენგენის ზონაში გადაადგილებას, აქ ყოველთვის შეიძლება მგზავრების ჯანმრთელობის მდგომარეობის შემოწმება“, - განაცხადა ევროკომისარმა.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.

მართალია თუ არა, რომ კორონავირუსმა უხანის სამეცნიერო ლაბორატორიიდან გაჟონა? ამ ბმულზე ნახეთ.

რა უნდა ვიცოდეთ პანდემიის შესახებ, წაიკითხეთ აქ.