Bellingcat-მა ხანგოშვილის მკვლელობის კიდევ ერთი მონაწილის ვინაობა დაადგინა

რუსეთის უსაფრთხოების ფედერალური სამსახურის (ФСБ) სპეცდანაყოფ „ვიმპელის“ ყოფილი ოფიცერი რომან დემიანჩენკო ბერლინში ზელიმხან ხანგოშვილის მკვლელობაში მონაწილეობდა. ამის შესახებ ინფორმაციას Bellingcat-ი, Der Spiegel-ი და The Insider-ი ავრცელებენ.

მათ მიერ ჩატარებული ჟურნალისტური გამოძიების შედეგად ირკვევა, რომ 1980 წელს დაბადებული დემიანჩენკო ასევე ცნობილია „რომან დავიდოვისა“ და „რომან ნიკოლაევის“ სახელებით. მისი ნამდვილი სახელი ჟურნალისტებმა შენგენის ვიზისთვის „რომან დავიდოვის“ მიერ გადაღებული ფოტოს მეშვეობით დაადგინეს. ამ ვიზით დემიანჩენკო ევროკავშირში ხანგოშვილის მკვლელობამდე ორი კვირით ადრე ჩავიდა. „დავიდოვის“ ფოტო დემიანჩეკოს პირადობის დამადასტურებელ მოწმობაზე არსებული ფოტოს იდენტურია.

Bellingcat-ის ცნობით, რომან დემიანჩენკო „ვიმპელში“ 2011 წლამდე მსახურობდა, 31 წლის ასაკში კი მას პენსია დაენიშნა - სავარაუდოდ, ერთ-ერთი სპეცოპერაციის დროს მიღებლი ჭრილობის გამო. შემდგომ წლებში მისი საქმიანობის შესახებ ამ ეტაპზე არაფერია ცნობილი.

Bellingcat-ისა და The Insider-ის მტკიცებით, დემიანჩენკოს სატელეფონო საუბრების მეტამონაცემები მეტყველებს იმაზე, რომ ის ხშირად ყოფილა „ვიმპელის“ ოფისში, ხვდებოდა ხელმძღვანელობას, მათ შორის სპეცდანაყოფის ვეტერანთა კავშირის ხელმძღვანელ ედუარდ ბანდერსკის და ФСБ-ს მოქმედ თანამშრომლებს. გამოცემის ინფორმაციით, ხანგოშვილის სავარაუდო მკვლელი ვადიმ კრასიკოვი, რომელიც გერმანიის პოლიციამ დააკავა, ასევე ხვდებოდა ედუარდ ბანდერსკის.

ჟურნალისტური გამოძიების ავტორები აცხადებენ, რომ მათ მიერ მოპოვებული ახალი ინფორმაცია ამყარებს ვერსიას იმის შესახებ, რომ ზელიმხან ხანგოშვილის მკვლელობა დაგეგმა და განახორციელა კომპანია „ვიმპელმა“, რომელიც რუსეთის ФСБ-სთან იყო კოორდინაციაში. მათი განცხადებით, კომპანია „ვიმპელი“, ფაქტობრივად, ФСБ-ს ქვედანაყოფს წარმოადგენს და „უცხო ქვეყნებში შეკვეთილი მკვლელობების შესრულება“ ევალება.

პანკისის ხეობის მკვიდრი ზელიმხან ხანგოშვილი ბერლინში 2019 წლის 23 აგვისტოს მოკლეს. ბერლინის პოლიციამ მკვლელობის ბრალდებით რუსეთის 48 წლის მოქალაქე დააკავა, რომლის ნამდვილი ვინაობაც დღემდე უცნობია. Bellingcat-ი ჟურნალისტურმა გამოძიებამ დაადგინა, რომ ის ვადიმ კრასიკოვია, რომელსაც რუსეთში ორი შეკვეთილი მკვლელობისთვის ეძებდნენ.