მოსკოვის საქალაქო სასამართლომ ალექსეი ნავალნის ორგანიზაცია, „კორუფციასთან ბრძოლის ფონდი“ ექსტრემისტულ ორგანიზაციად ცნო

მოსკოვის საქალაქო სასამართლომ ალექსეი ნავალნის ორგანიზაცია, „კორუფციასთან ბრძოლის ფონდი“ ექსტრემისტულ ორგანიზაციად ცნო.

სასამართლომ მოსკოვის პროკურატურის შუამდგომლობა დააკმაყოფილა. „კორუფციასთან ბრძოლის ფონდის“ გარდა, მოსკოვის საქალაქო სასამართლომ ექსტრემისტულ ორგანიზაციებად „მოქალაქეების უფლებების დაცვის ფონდი“ და საზოგადოებრივი მოძრაობა „ნავალნის შტაბი“ ცნო.

სასამართლოს გადაწყვეტილებით, აღნიშნული ორგანიზაციების რუსეთის ტერიტორიაზე საქმიანობა იკრძალება. მათ ეკრძალებათ ინფორმაციის გავრცელება, ფინანსური ოპერაციების განხორციელება, არჩევნებში მონაწილეობა და აქციების ორგანიზება, ხოლო ორგანიზაციების თანამშრომლებს 6-წლიანი პატიმრობა ემუქრებათ, თუ აღნიშნულ ქმედებებს განახორციელებენ.

დაცვის მხარე აცხადებს, რომ მოსკოვის საქალაქო სასამართლოს აღნიშნულ გადაწყვეტილებას გაასაჩივრებს.

სასამართლოს გადაწყვეტილებაში ნათქვამია, რომ „აღნიშნული ორგანიზაციები რუსეთში სოციალური, საზოგადოებრივი და პოლიტიკური დესტაბილიზაციის პირობებს ჰქმნიან, ხოლო მათი ფაქტობრივი მიზანი საკონსტიტუციო წყობის შეცვლის პირობების შექმნაა, მათ შორის „ფერადი რევოლუციების“ მეშვეობით“.