მედია: აშშ-მ ქაბულში სავარაუდოდ ტერორისტების წინააღმდეგ საჰაერო იერიში განახორციელა

ამერიკის შეერთებული შტატების სამხედრო ძალებმა ავღანეთის დედაქალაქში საჰაერო იერიში განახორციელეს. ამის შესახებ AFP წერს.

გამოცემის ინფორმაციით, იერიშის სამიზნე „ისლამური სახელმწიფოს“ ადგილობრივი ორგანიზაციის წევრები გახდნენ. „თალიბანში“ კი აცხადებენ, რომ თავდასხმის შედეგად თვითმკვლელი ტერორისტი დაიღუპა, რომელიც ქაბულის საერთაშორისო აეროპორტში აფეთქების მოწყობას აპირებდა, სადაც ამ დრომდე ამერიკული სამხედროების ევაკუაცია მიმდინარეობს. სხვა დეტალები ამ ეტაპზე უცნობია.

ინფორმაცია ქაბულში მომხდარი აფეთქების შესახებ ცოტა ხნის წინ გავრცელდა.

26 აგვისტოს ქაბულში ტერაქტის შედეგად 170 ადამიანი დაიღუპა. მომხდარზე პასუხისმგებლობა ტერორისტულმა დაჯგუფება „ისლამური სახელმწიფოს“ ადგილობრივმა ფრთამ ISIS-K-მ აიღო. აშშ-ის თავდაცვის დეპარტამენტის განცხადებით, თავდასხმას 13 ამერიკელი სამხედრო ემსხვერპლა, ხოლო 18 - დაჭრილია. აშშ-ის პრეზიდენტის, ჯო ბაიდენის ბრძანებით, ტერაქტის ორგანიზატორებზე საჰაერო თავდასხმა განხორციელდა, რის შედეგადაც „ისლამური სახელმწიფოს“ ორი ლიდერი დაიღუპა, ერთი კი დაიჭრა.