აშშ კრემლს აფრთხილებს, რომ უკრაინაში შეჭრა სანქციების დაწესებას გამოიწვევს, რომელიც მოსკოვს იმაზე მეტად დააზარალებს, ვიდრე აქამდე დაწესებული სანქციები

აშშ რუსეთს მოუწოდებს, თავისი ჯარები უკრაინის საზღვრიდან გაიყვანოს და აფრთხილებს, რომ უკრაინაში რუსეთის შეჭრა სანქციების დაწესებას გამოიწვევს, რომელიც მოსკოვს იმაზე მეტად დააზარალებს, ვიდრე აქამდე დაწესებული სანქციები.

„ჩვენ არ ვიცით, მიიღო თუ არა პრეზიდენტმა პუტინმა უკრაინაში შეჭრის გადაწყვეტილება. ჩვენ ვიცით, რომ ის აყალიბებს ამის შესაძლებლობას. თუ რუსეთი დაპირისპირების გზას გაჰყვება, ჩვენ ნათლად განვაცხადეთ, რომ მტკიცედ ვუპასუხებთ, მათ შორის, მაღალი გავლენის მქონე ეკონომიკური ზომების გამოყენებით, რომელთა განხორციელებისგან წარსულში თავს ვიკავებდით“, - აღნიშნა აშშ-ის სახელმწიფო მდივანმა, ენტონი ბლინკენმა ნატოს მინისტერიალის დასრულების შემდეგ გამართულ პრესკონფერენციაზე.

ენტონი ბლინკენის თქმით, აშშ შეშფოთებულია მტკიცებულებებით, რომ რუსეთმა უკრაინის წინააღმდეგ მნიშვნელოვანი აგრესიული ქმედებები დაგეგმა.

აშშ-ის სახელმწიფო მდივანმა ასევე აღნიშნა, რომ ყველაზე იმედისმომცემი გზა იქნება, თუ უკრაინა და რუსეთი მინსკის შეთანხმების ფარგლებში დიალოგს დაუბრუნდებიან, რომლის ამოცანა აღმოსავლეთ უკრაინაში სამხედრო კონფლიქტის დასრულებაა.

30 ნოემბერს, ნატოს გენერალურმა მდივანმა, იენს სტოლტენბერგმა განაცხადა, რომ რუსეთს უკრაინის წინააღმდეგ აგრესია ძვირად დაუჯდება, რასაც სერიოზული პოლიტიკური და ეკონომიკური შედეგები მოჰყვება.