სტოლტენბერგი ქვეყნებს ფხენიანზე ეკონომიკური ზეწოლისკენ მოუწოდებს

ნატოს გენერალური მდივანი იენს სტოლტენბერგი მოუწოდებს ქვეყნებს გააძლიერონ ზეწოლა ჩრდილოეთ კორეაზე და გააფართოვონ სანქციები. ამის შესახებ სტოლტენბერგმა ტალინში ევროკავშირის თავდაცვის უწყებათა წარმომადგენლებთან შეხვედრის დაწყებამდე განაცხადა. ინფორმაციას Reuters-ი ავრცელებს.

ჟურნალისტებმა ნატოს გენერალურ მდივანს რუსეთის პრეზიდენტ ვლადიმერ პუტინის განცხადებაზეც ჰკითხეს, რომლის მიხედვითაც პუტინს მიაჩნია, რომ ჩრდილოეთ კორეისთვის სანქციების დაწესებას აზრი არ აქვს. სტოლტენბერგმა ამასთან დაკავშირებით თქვა:

"გაეროში ჩრდილოეთ კორეაზე სანქციები უკვე შეთანხმებულია და მნიშვნელოვანია, რომ მათი იმპლემენტაცია მოხდეს", - განაცხადა სტოლტენბერგმა.

ფხენიანის წინააღმდეგ სანქციათა გაფართოების წინადადებით დღეს ევროკავშირის უმაღლესმა წარმომადგენელმა საგარეო პოლიტიკისა და უსაფრთხოების საკითხებში ფედერიკა მოგერინიმ ტალინში ევროკავშირის საგარეო უწყებათა წარმომადგენლებს შეხვედრაზე მიმართა.

ცნობილია, რომ გერმანიის კანცლერი და აშშ-ის პრეზიდენტი ჩრდილოეთ კორეის წინააღმდეგ მკაცრი სანქციების მიღებას უჭერენ მხარს. რუსეთის პრეზიდენტი ვლადიმერ პუტინი კი აცხადებს, რომ ფხენიანის წინააღმდეგ სანქციებს აზრი არ აქვს.

გაეროს უშიშროების საბჭომ ჩრდილოეთ კორეის მიერ ბირთვული ბომბის გამოცდის გამო საგანგებო სხდომა 4 სექტემბერს გამართა, სადაც ცნობილი გახდა, რომ გაერო ჩრდილოეთ კორეის შესახებ რეზოლუციას ერთ კვირაში მიიღებს.

ოფიციალური ფხენიანის ცნობით, 3 სექტემბერს ჩრდილოეთ კორეამ წარმატებით გამოსცადა წყალბადის ბომბი, რომლის დამაგრებაც შორ მანძილზე მოქმედ რაკეტაზეა შესაძლებელი. 

გავრცელებული ინფორმაციით, სწორედ ბომბის გამოცდამ გამოიწვია ჩრდილოეთ კორეაში 6.3 მაგნიტუდის მიწისძვრა. 

აშშ-ის პრეზიდენტმა დონალდ ტრამპმა იაპონიის პრემიერმინისტრ სინძო აბესთან სატელეფონო საუბარში დაადასტურა მზადყოფნა, ჩრდილოეთ კორეის წინააღმდეგ ბირთვული იარაღი გამოიყენოს. 

მანამდე, აშშ-ის თავდაცვის მდივანმა ჯეიმს მეტისმა განაცხადა, რომ ვაშინგტონი, აშშ-ის ან მისი მოკავშირეების ტერიტორიებისთვის საფრთხის შექმნის შემთხვევაში, ჩრდილოეთ კორეას მასშტაბურ სამხედრო პასუხს გასცემს.