G7-ის ლიდერები რუსეთს მოუწოდებენ, შეწყვიტოს თავისი აგრესია და დაუყოვნებლივ, სრულად და უპირობოდ გაიყვანოს თავისი ჯარები უკრაინის ტერიტორიიდან

„დიდი შვიდეულის“ (G7) ქვეყნების ლიდერები რუსეთს მოუწოდებენ, შეწყვიტოს თავისი აგრესია და დაუყოვნებლივ, სრულად და უპირობოდ გაიყვანოს თავისი ჯარები უკრაინის საერთაშორისოდ აღიარებული ტერიტორიიდან.

„რუსეთმა დაიწყო ეს ომი და რუსეთს შეუძლია დაასრულოს ის. გასულ წელს რუსულმა ძალებმა ათასობით უკრაინელი მოკლეს. რუსეთმა გაანადგურა საავადმყოფოები, სკოლები, ენერგეტიკული და კრიტიკული ინფრასტრუქტურა და დატოვა ისტორიული ქალაქები ნანგრევებში. რუსული ძალებისგან გათავისუფლებულ რაიონებში არის მასობრივი საფლავების, სექსუალური ძალადობის, წამებისა და სხვა სისასტიკის მტკიცებულებები. ჩვენ მკაცრად ვგმობთ რუსეთის ყველა აღმაშფოთებელ ქმედებას. რუსეთის თავდასხმის ფონზე, უკრაინელები უფრო ერთიანები, ამაყები და მტკიცედ განწყობილნი არიან, ვიდრე ოდესმე“, - ნათქვამია განცხადებაში.

განცხადებაში ხაზგასმით აღნიშნულია, რომ უკრაინის წინააღმდეგ რუსეთის ომი ასევე არის თავდასხმა ერთა სუვერენიტეტის, სახელმწიფოთა ტერიტორიული მთლიანობისა და ადამიანის უფლებების დაცვის ფუნდამენტურ პრინციპებზე.

„ჩვენ კვლავ ვაცხადებთ, რომ რუსეთის უპასუხისმგებლო ბირთვული რიტორიკა მიუღებელია და რუსეთის მიერ ქიმიური, ბიოლოგიური, რადიოლოგიური ან ბირთვული იარაღის ნებისმიერ გამოყენებას მძიმე შედეგები მოჰყვება“, - ნათქვამია განცხადებაში.