ისრაელის ხელისუფლებამ გადაწყვიტა პალესტინის მხარდამჭერი განცხადებების გამო სასწავლო პროგრამებიდან გრეტა ტუნბერგის შესახებ ინფორმაცია ამოიღოს

ისრაელის განათლების სამინისტროში განაცხადეს, რომ პალესტინის მხარდამჭერი განცხადებების გამო, სასწავლო პროგრამებიდან შვედი აქტივისტის, გრეტა ტუნბერგის შესახებ ყველანაირ ინფორმაციას ამოიღებს. ამის შესახებ ადგილობრივი მედია წერს.

„ჰამასი“ ტერორისტული ორგანიზაციაა, რომელიც 1 400 ისრაელელის, მათ შორის ქალების, ბავშვებისა და მოხუცების მკვლელობაზე და 200-ზე მეტი ადამიანის გატაცებაზეა პასუხისმგებელი. ტუნბერგის პოზიცია მას ართმევს უფლებას იყოს მორალური მაგალითი, მას აღარ აქვს უფლება შთაგონების წყარო იყოს ისრაელის სტუდენტებისთვის“, - აღნიშნავენ უწყებაში.

რამდენიმე დღით ადრე ტუნბერგმა სოციალურ ქსელებში პალესტინის მხარდამჭერი პოსტი გამოაქვეყნა.

„დღეს პალესტინასა და ღაზის სექტორს ვუცხადებთ სოლიდარობას. მსოფლიომ ხმა უნდა ამოიღოს და მოითხოვოს ცეცხლის დაუყოვნებლივ შეწყვეტა, სამართლიანობა და მშვიდობა პალესტინელების და ყველა იმ მშვიდობიანი მოქალაქისთვის, ვისაც ეს შეეხო“, - დაწერა ტუნბერგმა.

სარაკეტო დარტყმა ისრაელზე 7 ოქტომბერს, ადგილობრივი დროით 06:30 საათზე განხორციელდა. მომხდარზე პასუხისმგებლობა ტერორისტულმა ორგანიზაცია „ჰამასმა“ აიღო. ორგანიზაციაში ისრაელის წინააღმდეგ ახალი სამხედრო ოპერაციის დაწყების შესახებ განაცხადეს. ისრაელის თავდაცვის ძალებმა „ომისთვის მზადყოფნის მდგომარეობა“ გამოაცხადა და ღაზას სექტორში „ჰამასის“ ობიექტებზე იერიში დაიწყო.