CNN: ტრამპის საარჩევნო შტაბის ყოფილ უფროსს 3 პასპორტი ჰქონდა

ამერიკის შეერთებული შტატების პრეზიდენტის დონალდ ტრამპის საარჩევნო შტაბის ყოფილ უფროსს 3 პასპორტი ჰქონდა და ჩინეთში ყალბი სახელის მიხედვით დარეგისტრირებული ტელეფონით იმოგზაურა. სკანდალურ ინფორმაციას ამერიკული ტელეკომპანია CNN-ი ავრცელებს.

მედიის ინფორმაციით, მიმდინარე წელს ის ყალბი სახელით მექსიკაში, ჩინეთსა და ეკვადორში იყო ჩასული, გასულ წელს კი დუბაიში, პანამაში, ჰავანაზე, შანხაიში, მადრიდსა და ტოკიოში. 

გარდა ამისა, ცნობილი ხდება, რომ პოლ მანაფორტი ურთიერთგამომრიცხავ ინფორმაციას ავრცელებდა მის ფინანსებთან დაკავშირებით. მაგალითად, 2016 წელს აცხადებდა, რომ მისი ქონება 28 მილიონ დოლარს შეადგენდა, სხვა დოკუმენტში კი წერდა, რომ მისი ქონება 63 მილიონს შეადგენდა. 

30 ოქტომბერს, ამერიკის საპრეზიდენტო არჩევნებში რუსეთის ჩარევასთან დაკავშირებით გამოძიების ფარგლებში, სპეციალურმა პროკურორმა, რობერტ მიულერმა დოკუმენტების ნაწილი გაასაჯაროვა, რომლის მიხედვითაც, პრეზიდენტის გარემოცვიდან სამი წევრი სხვადასხვა დანაშაულშია ეჭვმიტანილი. 

სამართალდამცავმა ორგანოებმა დონალდ ტრამპის წინასაარჩევნო შტაბის ყოფილ უფროსს, პოლ მანაფორტს და მის საქმიან პარტნიორ რიკ გეითსს ბრალი 12 პუნქტში წაუყენეს და სასამართლომ მათ შინაპატიმრობა მიუსაჯა. ბრალდებული პოლ მანაფორტი დანაშაულს არ აღიარებს.  

ბრალდების მიხედვით, მანაფორტს და გეითს ბრალად ედებათ,"აშშ-ის წინააღმდეგ შეთქმულება ფულის გათეთრების მიზნით, ასევე მოქმედება დაურეგისტრირებელი უცხოელი აგენტის სახელით, ცრუ ჩვენებების მიცემა უცხოელი აგენტების რეგისტრაციის კანონის (FARA) ფარგლებში და უცხოური საბანკო ანგარიშების დამალვა".

პოლ მანაფორტს ბრალის დამტკიცების შემთხვევაში 80 წლამდე, ხოლო მის საქმიან პარტნიორ რიკ გეითსს 70 წლამდე პატიმრობა, ასევე ფულადი ჯარიმა ემუქრებათ.

მილიარდერი პოლ მარაფორტი ტრამპის საარჩევნო შტაბს 2016 წლის ივნისიდან აგვისტომდე ხელმძღვანელობდა. ის გუნდიდან მას შემდეგ წავიდა, რაც გაირკვა, რომ ის უკრაინის ყოფილ პრეზიდენტ ვიქტორ იანუკოვიჩთან მუშაობდა და აშშ-ში უკრაინის „რეგიონების პარტიის“ ინტერესებს ლობირებდა.

ის ასევე მუშაობდა რუს მილიარდერ ოლეგ დერიპასკასთან. როგორც მედია წერდა, მას შეეძლო დერიპასკას და რუსეთის პრეზიდენტის ინტერესების ლობირება. დერიპასკამ ეს ინფორმაცია უარყო და Associated Press-ს უჩივლა კიდეც, მაგრამ მისი სარჩელი არ დააკმაყოფილეს.