ევროკავშირის ხელმძღვანელები დღეს ერდოღანთან, სტარმერთან და ტრუდოსთან მოლაპარაკებებს გამართავენ

ევროკომისიის პრეზდენტმა, ურსულა ფონ დერ ლაიენმა პრესკონფერენციაზე განაცხადა, რომ დღეს ის და ევროპული საბჭოს პრეზიდენტი, ანტონიუ კოშტა თურქეთის პრეზიდენტს, რეჯეფ თაიფ ერდოღანს, დიდი ბრიტანეთის პრემიერ-მინისტრს, კირ სტარმერს და კანადის პრემიერს, ჯასტინ ტრუდოს ტელეფონით გაესაუბრებიან.

როგორც ევროკომისიის ხელმძღვანელმა აღნიშნა, ის აპირებს გააცნოს ევროკავშირის პარტნიორ ქვეყნებს ევროპელი ლიდერების საგანგებო სამიტის შედეგები, რომელიც გუშინ გაიმართა.

„ეს დისკუსია მნიშვნელოვანია წევრი სახელმწიფოებისა და ჩვენი პარტნიორებისთვის, ზუსტად ამიტომ ჩვენ დილით ამ ევროპული საბჭოს შედეგებს მოვახსენებთ ჩვენს პარტნიორებს“, - თქვა ფონ დერ ლაიენმა.

მედიაში ვრცელედება ინფორმაცია, რომ ფონ დერ ლაიენი და კოშტა სატელეფონო საუბარს გამართავენ აგრეთვე ნორვეგიისა და ისლანდიის პრემიერ-მინისტრებთან.