ტრამპი ახლო აღმოსავლეთიდან ამერიკის მოქალაქეების ევაკუაციის გეგმის არარსებობაზე: ყველაფერი ძალიან სწრაფად მოხდა

აშშ-ის პრეზიდენტმა დონალდ ტრამპმა განაცხადა, რომ ახლო აღმოსავლეთიდან ამერიკელების ევაკუაციის გეგმა არ არსებობდა, რადგან ისრაელისა და ამერიკის ერთობლივი დარტყმა ირანზე „ძალიან სწრაფად მოხდა“. ინფორმაციას გამოცემა The Hill-ი ავრცელებს.

„ისინი [ირანი] ისრაელზე თავდასხმას ამზადებდნენ. ისინი სხვა ქვეყნებზეც ამზადებდნენ თავდასხმას. ახლა ამის მომსწრენი ხართ. ბევრი რაკეტა მიზანს აღწევს. მათ სხვა ქვეყნები დიდი ხნის განმავლობაში ჰქონდათ მიზანში ამოღებული“, - თქვა ტრამპმა.

გამოცემას აშშ-ის სახელმწიფო მდივნის თანაშემწის, დილან ჯონსონის განცხადება მოჰყავს, სადაც აღნიშნულია, რომ სახელმწიფო დეპარტამენტს 3 ათასამდე ამერიკელთან აქვს კონტაქტი, რომლებიც ახლო აღმოსავლეთში ჩარჩნენ, რადგან ისრაელის, კატარის, ირანის და სხვა ქვეყნების საჰაერო სივრცე კვლავ დაკეტილია.

ჯონსონმა აგრეთვე განაცხადა, რომ ტრამპის ადმინისტრაცია აქტიურად უზრუნველყოფს სამხედრო თვითმფრინავებსა და ჩარტერულ რეისებს, რათა ახლო აღმოსავლეთში ჩარჩენილი მოქალაქეები გამოიყვანოს.

როგორც The Hill-ი აღნიშნავს, ისრაელში ჩარჩენილი 500-მდე ამერიკის მოქალაქე სახელმწიფო დეპარტამენტს დაუკავშირდა და ქვეყნიდან გაყვანა სთხოვა. დღეის მდგომარეობით, 130 ადამიანზე მეტი ისრაელიდან გაყვანილია, კიდევ 100 ამერიკელი ქვეყანას უახლოეს მომავალში დატოვებს.