The Washington Post: „დარწმუნებული არ ვარ, რომ რეჟიმის დამხობამდე ბრძოლა ჩვენს ინტერესებში შედის“ - ისრაელის რამდენიმე მაღალჩინოსანი შეშფოთების გამოთქვამს ირანზე ესკალაციური და განუსაზღვრელი ვადით მიმდინარე თავდასხმის გამო

ისრაელის რამდენიმე მაღალჩინოსანი შეშფოთების გამოთქვამს ირანზე ესკალაციური და განუსაზღვრელი ვადით მიმდინარე თავდასხმის გამო და საუბრობს კონფლიქტიდან გამოსვლის შესაძლო გზებზე, რომლებმაც შესაძლოა შეაჩეროს ომი მანამ, სანამ ის რეგიონსა და გლობალურ ეკონომიკას კიდევ უფრო მეტ ზიანს მიაყენებს, - წერს ამერიკული გამოცემა The Washington Post-ის ჟურნალისტი, დევიდ იგნატიუსი.

საუბარი ომის დასრულებაზე ნაადრევია და გადაწყვეტილება თავდასხმების შეწყვეტის შესახებ დიდწილად პრეზიდენტ დონალდ ტრამპზეა დამოკიდებული, რომელიც კვლავ სრულ გამარჯვებას ესწრაფვის.

თუმცა, კვირას გამართულ სატელეფონო საუბარში, ისრაელის მაღალჩინოსანმა, რომელიც ირანის წინააღმდეგ ომის დაგეგმარებასა და სტრატეგიას კარგად იცნობს, განიხილა ტრამპის მიერ მოთხოვნილი „უპირობო კაპიტულაციის“ ალტერნატივები.

ტრამპი საბოლოო შედეგის რამდენიმე ვარიანტს შორის მერყეობს. თავდაპირველად იგი საუბრობდა მოლაპარაკების გზით შეთანხმებაზე რეჟიმის უფრო დამთმობ წევრებთან, თუმცა მას შემდეგ კაპიტულაციას ითხოვს, რადგან, მისი თქმით, მისი სასურველი პარტნიორები მოლაპარაკებებისთვის უკვე ლიკვიდირებულნი არიან. ტრამპის მსგავსად, ისრაელის პრემიერ-მინისტრმა, ბენიამინ ნეთანიაჰუმ განაცხადა, რომ სურს ბოლომდე მიჰყვეს პროცესს, რომელსაც მან შაბათს „ჭეშმარიტების მომენტი“ უწოდა.

მოლაპარაკებებისადმი ტრამპისა და ნეთანიაჰუს მიერ გამოხატული მიუღებლობა, შესაძლოა, კიდევ უფრო გაღრმავდეს კვირას გავრცელებული განცხადების შემდეგ, რომლის თანახმადაც, ირანის ახალი უზენაესი ლიდერი მოჯტაბა ხამენეი გახდება. იგი ყოფილი ლიდერის შვილია, რომელიც 28 თებერვალს თავის რეზიდენციაზე განხორციელებული მასირებული საჰაერო დარტყმის შედეგად დაიღუპა. ახალი ლიდერი ხისტი კურსის მომხრეა და „ისლამური რევოლუციის გუშაგთა კორპუსთან“ დაახლოებულია. იგი არ არის ის ადამიანი, რომელიც მოლაპარაკებების მაგიდასთან დაჯდება.

„დარწმუნებული არ ვარ, რომ რეჟიმის დამხობამდე ბრძოლა ჩვენს ინტერესებში შედის“, - განაცხადა ისრაელის ოფიციალურმა პირმა. „არავის სურს დაუსრულებელი ამბავი“.

ოფიციალური პირის განცხადებით, ისრაელისა და ამერიკის საჰაერო კამპანია სამხედრო მიზნების მიღწევის დასკვნით ეტაპს უახლოვდება. იგი თითქმის სრულად ანადგურებს იმას, რაც ირანის ბირთვული პროგრამისგან ივნისში აშშ-ის მიერ განხორციელებული დაბომბვების შემდეგ დარჩა, ისევე როგორც ბალისტიკური რაკეტების მარაგებს, იარაღის მწარმოებელ ქარხნებს და სამხედრო, სადაზვერვო თუ შიდა უსაფრთხოების ძალების მაღალ ეშელონებს.

„როდესაც ვკითხე, თუ რამდენი ხანი დასჭირდებოდა ამ სამხედრო მისიის დასრულებას, ოფიციალურმა პირმა პასუხისგან თავი შეიკავა“, - წერს დევიდ იგნატიუსი.

„რა თქმა უნდა, ჩვენ გვსურს რეჟიმის დამხობა, მაგრამ ეს არ არის ერთადერთი საბოლოო მიზანი“, - განაცხადა ისრაელის წარმომადგენელმა. მას შემდეგ, რაც ძირითადი სამხედრო სამიზნეები განადგურდება, „ისრაელი თავის მიზნებს მიღწეულად ჩათვლის“, - განმარტა მან. „ირანი კაპიტულაციას არ განოაცხადებს, თუმცა მას შეუძლია გამოგზავნოს სიგნალები აშშ-ის პირობებით ცეცხლის შეწყვეტაზე დათანხმების შესახებ“.

„ამ მაღალჩინოსნის შეხედულებები, როგორც ჩანს, გამოხატავს თავდაცვის უწყების იმ წარმომადგენელთა მოსაზრებას, რომელთაც იმედგაცრუება გამოიწვია ნეთანიაჰუს გადაწყვეტილებამ - გააგრძელოს საბრძოლო მოქმედებები ღაზაში მკაფიოდ განსაზღვრული ფინალური მიზნის გარეშე - და რომლებიც სკეპტიკურად უყურებენ მის სტრატეგიულ დაგეგმარებას“, - წერს ჟურნალისტი.

„ჩვენ ვერ ვხედავთ ვერავის, ვისაც რეჟიმის ჩანაცვლება შეუძლია“, — განაცხადა ისრაელის ოფიციალურმა პირმა და შეაჯამა მოსაზრება, რომელსაც აშშ-ისა და ისრაელის დაზვერვის ანალიტიკოსები იზიარებენ.

მისი თქმით, რეჟიმის ცენტრალიზებული მართვისა და კონტროლის სტრუქტურა სუსტდება და შეიმჩნევა შიდა განხეთქილების ადრეული ნიშნები, თუმცა, არაფერი მიუთითებს იმაზე, რომ სისტემის რღვევა ახლოსაა.