ტრამპის შესახებ სკანდალური წიგნი დღეს გამოვა

BBC-ის ცნობით, სენსაციური წიგნის „ცეცხლი და მრისხანება ტრამპის თეთრ სახლში“ ავტორმა, ჟურნალისტმა მაიკლ ვულფიმ განაცხადა, რომ მისი წიგნის გამოცემის თარიღმა რამდენიმე დღით გადმოიწია და დღეს, პარასკევს იგეგმება. ხუთშაბათს ცნობილი გახდა, რომ ტრამპის ადვოკატები წიგნის გამოცემის ჩაშლას ცდილობდნენ. ამერიკული მედიის ცნობით, მასში ტრამპის პრეზიდენტობის სენსაციური დეტალებია თავმოყრილი. 

წიგნის ავტორს მაიკლ ვულფის და მის გამომცემელს მოსთხოვეს, სასწრაფოდ შეეჩერებიათ ამ კრებულის გამოცემა, მისი გავრცელება და გაყიდვა. სენსაციურ გამოცემაში სხვა მრავალი დეტალის გარდა, თეთრი სახლის ყოფილი მთავარი სტრატეგის სტივ ბენონის ინტერვიუც არის მოყვანილი, რომელშიც ის სკანდალურ მასალას ასაჯაროებს. მაგალითად, ბენონი ტრამპის შვილის და რუსული მხარის შეხვედრას არჩევნების წინ ღალატს უწოდებს. 

წიგნში ვულფი რამდენიმე მნიშვნელოვან ინფორმაციას ავრცელებს. კერძოდ:

ტრამპის გუნდი შოკირებული და შეშინებული იყო, როდესაც გაირკვა, რომ მან არჩევნებში გაიმარჯვა;

მელანია ტრამპი ხმების დათვლის ღამით ტიროდა;

ტრამპი გაბრაზდა, რომ ცნობილმა სახეებმა მის ინაუგურაციაზე დასწრება არ ისურვეს;

პრეზიდენტს თეთრი სახლი აღიზიანებს და აშინებს;

ივანკა ტრამპი მამის ვარცხნილობას დასცინოდა და ხშირად უყვებოდა მეგობრებს, როგორ იყენებდა პრეზიდენტი თმებს.

ეს წინგი 200 ინტერვიუს საფუძველზე დაიწერა. 

პრეზიდენტის ადვოკატები არ გამორიცხავენ, რომ სასამართლოს ცილისწამების ბრალდებით მიმართონ. ამის შესახებ Washington Post წერს. ამაზე ჯერ არც წიგნის ავტორს და არც გამომცემელს კომენტარი არ გაუკეთებიათ.