აშშ-ს ირანის საკითხზე გაეროს უშიშროების საბჭოს მოწვევისთვის აკრიტიკებენ

გაეროს უშიშროების საბჭოს საგანგებო სხდომაზე, რომელიც აშშ-ის ინიციატივით ირანის საკითხის განსახილველად მოიწვიეს, რუსეთის წარმომადგენელმა ვაშინგტონი მკვეთრად გააკრიტიკა. BBC-ის ინფორმაციით, გაეროში რუსეთის ელჩის ვასილ ნებენზიას განცხადებით, ეს არის ირანის შიდა საქმეებში ჩარევის მცდელობა, რაც უშიშროების საბჭოს ავტორიტეტს აკნინებს. მან აშშ თავისი უფლების ბოროტად გამოყენებაში დაადანაშაულა. მისივე თქმით, უშიშროების საბჭოს მოწვევის რეალური მიზეზი - თეირანის ბირთვულ პროგრამაზე შეთანხმების გაუქმების მცდელობაა. 

ირანის წარმომადგენელმა ასევე დაადანაშაულა ვაშინგტონი უფლებამოსულების ბოროტად გამოყენებაში. ირანის საგარეო საქმეთა მინისტრმა ჯავად ზარიფმა კი Twitter-ზე დაწერა, რომ გაეროს უშიშროების საბჭომ „აშშ-ის პოლიტიკა დაგმო, რომელიც თავის მანდატს ბოროტად იყენებს“. 

The UNSC rebuffed the US' naked attempt to hijack its mandate. Majority emphasized the need to fully implement the JCPOA and to refrain from interfering in internal affairs of others. Another FP blunder for the Trump administration. Iran's statement:  https://t.co/QsbihBW69V

— Javad Zarif (@JZarif) 5 января 2018 г.

საფრანგეთის წარმომადგენელმა განაცხადა, რომ ირანის საქმეებში ჩარევა შეიძლება კონტრპროდუქტიული იყოს. მისივე თქმით, ირანში გამართული საპროტესტო აქციები შეშფოთებას იწვევს, თუმცა მსოფლიო მშვიდობას და უსაფრთხოებას საფრთხეს არ უქმნის. ფრანსუა დელატრის განცხადებით, საერთაშორისო საზოგადოებამ ირანის ბირთვული შეთანხმების პირობები უნდა შეასრულოს. 

BBC-ის ინფორმაციით, აშშ-ის წარმომადგენლის ნიკი ჰეილის გადაწყვეტილება გაეროს უშიშროების საბჭოს სხდომის მოწვევის შესახებ საბჭოს სხვა წევრებისთვის მოულოდნელი იყო. ჰეილიმ საბჭოზე განაცხადა, რომ ვაშინგტონი ღიად უჭერს მხარს ირანის საპროტესტო აქციებს. 

ირანში რამდენიმე დღეა ანტისახელისუფლებო აქციები მიმდინარეობს. ამ აქციების პარალელურად გაიმართა პროსამთავრობო აქციებიც.

3 იანვარს ირანის გუშაგთა საბჭოს გენერალმა მეჯ გენ მოჰამედ ალი ჯაფარმა, სახელმწიფოს მხარდამჭერ აქციაზე, "ამბოხის" დამარცხების შესახებ განაცხადა. 

თეირანში, მეშჰედში, ისპაჰანსა და ირანის სხვა დიდ ქალაქებში მასობრივი აქციები 28 დეკემბრიდან  დაიწყო. ქვეყნის პრეზიდენტის, ჰასან როუჰანის თქმით, აქციები შიდა პრობლემებით და გარე ძალების წაქეზებით არის გამოწვეული. ბოლო ინფორმაციით, საპროტესტო აქციების დროს, სულ ცოტა, 20 ადამიანი დაიღუპა.