AXIOS: აშშ განიხილავს ირანთან 20 მილიარდი დოლარის მოცულობის შეთანხმებას ფორმულით „ნაღდი ფული ურანის სანაცვლოდ“

აშშ და ირანი ომის დასასრულებლად გეგმაზე აწარმოებენ მოლაპარაკებებს. განხილვის ერთ-ერთი საკითხი, ორი ამერიკელი მაღალჩინოსნისა და მოლაპარაკებების შესახებ ინფორმირებული კიდევ ორი წყაროს ცნობით, ითვალისწინებს აშშ-ის მხრიდან 20 მილიარდი დოლარის მოცულობის გაყინული ირანული აქტივების გათავისუფლებას, რის სანაცვლოდაც ირანმა გამდიდრებული ურანის მარაგი უნდა დათმოს, - წერს ამერიკული გამოცემა AXIOS-ი.

ამ კვირაში მოლაპარაკებებში სტაბილური პროგრესი შეინიშნებოდა, თუმცა მხარეებს შორის კვლავ რჩება მნიშვნელოვანი აზრთა სხვაობა. ამ პირობებით შეთანხმების მიღწევა ომს დაასრულებს, თუმცა, ამავდროულად, შესაძლოა ირანის მიმართ ხისტი პოლიტიკის მომხრეების მწვავე უკმაყოფილება გამოიწვიოს.

ტრამპის ადმინისტრაციისთვის ერთ-ერთ მთავარ პრიორიტეტს წარმოადგენს იმის უზრუნველყოფა, რომ ირანს ხელი არ მიუწვდებოდეს გამდიდრებული ურანის თითქმის 2,000 კილოგრამიან მარაგზე, რომელიც მის მიწისქვეშა ბირთვულ ობიექტებშია განთავსებული; განსაკუთრებით კი 450 კილოგრამზე, რომელიც 60%-მდეა გამდიდრებული.

ირანელებს კი, თავის მხრივ, ფული სჭირდებათ. მხარეები აწარმოებენ მოლაპარაკებებს იმის შესახებ, თუ რა ბედი ეწევა ურანის მარაგს და ირანის აქტივების რა ნაწილი განიბლოკება. ისინი ასევე განიხილავენ იმ პირობებს, რომელთა საფუძველზეც ირანი შეძლებს ამ თანხის გამოყენებას.

ორი წყაროს ცნობით, მოლაპარაკებების ადრეულ ეტაპზე აშშ მზად იყო გაეთავისუფლებინა 6 მილიარდი დოლარი, რათა ირანს შეეძინა საკვები, მედიკამენტები და სხვა ჰუმანიტარული დანიშნულების საქონელი. ირანელები კი 27 მილიარდ დოლარს ითხოვდნენ.

წყაროების თანახმად, ბოლო ციფრი, რომელზეც აშშ და ირანი მსჯელობენ, 20 მილიარდი დოლარია. ერთ-ერთი ამერიკელი მაღალჩინოსნის განცხადებით, ეს თავად აშშ-ის წინადადება იყო. მეორე ამერიკელმა ოფიციალურმა პირმა კი ფორმულა „ნაღდი ფული ურანის სანაცვლოდ“ დაახასიათა, როგორც „ერთ-ერთი მრავალრიცხოვანი განხილვიდან“.

ამავდროულად, აშშ-მა ირანს სთხოვა თანხმობა მთელი ბირთვული მასალის შეერთებულ შტატებში ტრანსპორტირებაზე, რაზეც ირანელებმა უარი თქვეს და მხოლოდ ქვეყნის შიგნით მისი კონცენტრაციის შემცირების პირობა დადეს.

კომპრომისული წინადადებით, რომელიც ამჟამად განხილვის პროცესშია, მაღალგამდიდრებული ურანის ნაწილი მესამე ქვეყანაში გაიგზავნება, ხოლო ნაწილის კონცენტრაციის შემცირება უშუალოდ ირანში, საერთაშორისო მონიტორინგის ქვეშ მოხდება.