ქსენია სობჩაკმა მარიხუანის ლეგალიზება მოითხოვა

რუსეთის პრეზიდენტობის კანდიდატი ქსენია სობჩაკი მარიხუანის ლეგალიზაციის მოთხოვნით გამოვიდა. ამის თაობაზე სობჩაკმა კალინინგრადში ამომრჩევლებთან შეხვედრაზე განაცხადა. 

„მე თავად ამ საშუალებით არ ვსარგებლობ, მაგრამ რატომ ითვლება არყის ბოთლებით სმა ჩვენს ქვეყანაში ნორმალურად და მარიხუანის მოხმარება, რომელსაც ნაკლები ზიანი მოაქვს, დაუშვებლად?“, - განაცხადა შეხვედრაზე სობჩაკმა.

სობჩაკის თქმით, მარიხუანას ლეგალიზაცია რუსეთში „ნარკოტიკების ეპიდემიის“ პრობლემას მოხსნის.

2017 წლის დეკემბრის ბოლოს, რუსეთის ცენტრალურმა საარჩევნო კომისიამ ქსენია სობჩაკს საპრეზიდენტო არჩევნებში მონაწილეობის უფლება მისცა. 

18 ოქტომბერს ცნობილი გახდა, რომ ქსენია სობჩაკი რუსეთის საპრეზიდენტო არჩევნებში აპირებს მონაწილეობას, რომლის ჩატარებაც 2018 წლის მარტში იგეგმება. 23 დეკემბერს მან წინასაარჩევნო კამპანიის პლატფორმა გამოაქვეყნა. მას „123 რთული ნაბიჯი" ჰქვია და ოთხი ნაწილისგან შედგება - "საშინაო პოლიტიკა", "ეკონომიკის განვითარება", "სოციალური პოლიტიკა" და "საგარეო პოლიტიკა".