POLITICO: უკრაინას მეტი საჰაერო თავდაცვა სჭირდება, თუმცა, მოკავშირეებს დახმარების შესაძლებლობებში ეჭვი ეპარებათ

უკრაინას საჰაერო თავდაცვის სისტემები და რაკეტები უფრო მეტად სჭირდება, თუმცა, მოკავშირეებს უკვე ეჭვი ეპარებათ, შეძლებენ თუ არა კიევის დახმარებას რუსეთის მზარდი მასშტაბის თავდასხმების გასამკლავებლად, - განუცხადა POLITICO-ს უკრაინის ელჩმა ნატოში ალიონა გეტმანჩუკმა.

„მათი ლოგიკა მარტივია: შეგვიძლია კი რეალურად ეფექტურად ვიმოქმედოთ ასეთი მასშტაბური ტერორის წინააღმდეგ, როდესაც უკრაინის ყველაზე გადაუდებელი საჭიროება Patriot-ის რაკეტსაწინააღმდეგო რაკეტებია, ჩვენ კი მათი საკმარისი რაოდენობა არ გვაქვს, რადგან მარაგები ამოწურულია, ხოლო წარმოების ტემპი საჭირო დონეს ვერ აღწევს?“ - განაცხადა გეტმანჩუკმა.

მისი თქმით, კიევის მოკავშირეებმა უნდა გააცნობიერონ, რომ უკრაინის დახმარება მათ ინტერესებშიც შედის.

„უნდა შევწყვიტოთ უკრაინისთვის თავდაცვის შესაძლებლობების უზრუნველყოფის აღქმა მხოლოდ უკრაინის მხარდაჭერის საკითხად. ეს თავად ნატოს ინტერესშიც შედის... რაც უფრო მეტ დრონსა და რაკეტას გავანადგურებთ უკრაინის საჰაერო სივრცეში, მით ნაკლები მათგანი გადაკვეთს ნატოს მეზობელი ქვეყნების საზღვრებს“, - განაცხადა უკრაინელმა დიპლომატმა.

გეტმანჩუკმა აღნიშნა, რომ დასავლეთის ქვეყნებს კვლავ აქვთ რაკეტსაწინააღმდეგო რაკეტების მარაგები, მათ შორის ისეთი რაკეტებიც, რომელთა ექსპლუატაციის ვადა დასასრულს უახლოვდება.

„მათი ექსპლუატაციიდან ამოღების უკეთესი გზა, ვიდრე უკრაინის ცაში მათი გამოყენებაა, პრაქტიკულად არ არსებობს“, - განაცხადა გეტმანჩუკმა.

კიევი პრობლემის გადასაჭრელად კონკრეტულ სქემას სთავაზობს: მოკავშირეებმა უკრაინას ამჟამად საკუთარი მარაგებიდან რაკეტსაწინააღმდეგო რაკეტები უნდა გადასცენ, ხოლო უკრაინა მათ მოგვიანებით ჩაანაცვლებს იმ რაკეტებით, რომლებიც უკვე შეუკვეთა.

„ეს გაცვლაა და არა შემოწირულება. ჩვენთვის მთავარია, ეს ზამთარი გადავიტანოთ“, - განაცხადა გეტმანჩუკმა.

როგორც გამოცემა იუწყება, უკრაინა მნიშვნელოვან შეკვეთებს აკეთებს, როგორც პარტნიორების დაფინანსებით, ისე ევროკავშირის 90 მილიარდი ევროს ოდენობის უკრაინის მხარდაჭერის სესხის გამოყენებით. კონტრაქტები მოიცავს არა მხოლოდ ასობით Patriot-ის რაკეტას, როგორც PAC-2-ს, ისე PAC-3-ს, არამედ ევროპულ სისტემებსაც, მათ შორის SAMP/T-სა და Aster 30-ის რაკეტებს, IRIS-T-ს სისტემებსა და სხვა შეიარაღებას.

რაკეტების დეფიციტის გამო უკრაინის საჰაერო თავდაცვის სისტემებს რუსეთის მზარდი რაოდენობის ბალისტიკური რაკეტების შეჩერება სულ უფრო უჭირთ. კიევს ასევე სჭირდება სხვა ტიპის საჰაერო თავდაცვის საშუალებები რუსეთის რეაქტიული ძრავებით აღჭურვილი დრონების გასანადგურებლად.

„ამიტომ, ჩვენი გადაუდებელი საჭიროებების მოკლე სია არა ერთ, არამედ სამ ძირითად კატეგორიას მოიცავს: Patriot-ის რაკეტსაწინააღმდეგო რაკეტებს, ჰაერი-ჰაერი ტიპის რაკეტებს და ყველა ტიპის MANPADS-ისა და მათთვის განკუთვნილ რაკეტებს“, - განაცხადა უკრაინელმა დიპლომატმა.

გეტმანჩუკმა ქვეყნებს მოუწოდა, პირდაპირი დახმარების გარდა გაზარდონ დაფინანსება ნატოს ხელმძღვანელობით მოქმედი PURL-ის პროგრამისთვის, რომლის ფარგლებშიც მოკავშირეები აშშ-ისგან შეიარაღებას ყიდულობენ და შემდეგ უკრაინას გადასცემენ.

უკრაინის ელჩმა ასევე აღნიშნა, რომ უკრაინისთვის ახლა დახმარება მოკავშირეებს ომის დასრულების შემდეგ ხარჯების დაზოგვაშიც დაეხმარება.

„რაც უფრო მეტის დაცვას შევძლებთ დღეს, მით ნაკლების აღდგენა მოგვიწევს ხვალ“, - განაცხადა გეტმანჩუკმა.