იური ლუცენკოს სურს, რომ სააკაშვილმა სასჯელი უკრაინაში მოიხადოს

უკრაინის გენერალურ პროკურორს, იური ლუცენკოს სურს, რომ დანაშაულის დამტკიცების შემთხვევაში, მიხეილ სააკაშვილმა პასუხი უკრაინაში აგოს. ამის შესახებ ლუცენკომ ტელეკომპანია TCH-თან ინტერვიუში განაცხადა.

„სიმართლე გითხრათ, ძალიან არ მინდა ქართულ საპატიმროში მისი გაშვება“ - განაცხადა უკრაინის გენერალურმა პროკურორმა.

იური ლუცენკოს თქმით, თუ მიხეილ სააკაშვილი უკრაინაში ვერ მიიღებს პოლიტიკურ თავშესაფარს, ექსტრადიციის გარდა რჩება ორი გზა - ნებაყოფლობით გაემგზავროს რომელიმე, არჩეულ ქვეყანაში, მაგალითად, ნიდერლანდში, სადაც მისი ოჯახი ცხოვრობს და მეორე - ნებაყოფლობითი, ან იძულებითი დეპორტაცია მის მიერ შერჩეულ ქვეყანაში, ან პოლონეთში, საიდანაც არალეგალურად შევიდა უკრაინის ტერიტორიაზე.

ოდესის ყოფილი გუბერნატორის მიხეილ სააკაშვილის თქმით, უკრაინის ხელისუფლება მისი ექსტრადირებისთვის ემზადება, თუმცა საქართველოს ხელისუფლებას მისი ექსტრადიცია არ სურს.

5 დეკემბერს უკრაიანის გენერალურმა პროკურატურამ აუდიოჩანაწერი გამოაქვეყნა, რომელშიც უწყების მტკიცებით, ოდესის ყოფილი გუბერნატორი მიხეილ სააკაშვილი და ბიზნესმენი სერგეი კურჩენკო საუბრობენ. მოგვიანებით, ექსპერტიზამ ამ ჩანაწერების ნამდვილობა დაადასტურა. 

პროკურატურის მტკიცებით, სწორედ მან გადაუხადა სააკაშვილს ხელისუფლების დამხობის მიზნით ქუჩის აქციების ორგანიზებისთვის 500 000 დოლარი. 

ოდესის ყოფილ გუბერნატორი მიხეილ სააკაშვილი კიევის პეჩერსკის რაიონული სასამართლოს გადაწყვეტილებით, 11 დეკემბერს პატიმრობიდან გათავისუფლდა. მანამდე ის ორჯერ დააკავეს. 26 იანვარს კიევის სასამართლომ სააკაშვილს ღამის საათებში სახლიდან გასვლა აუკრძალა. განაჩენი 6 თებერვლამდე იყო ძალაში.