ტრამპი: არავინ ყოფილა ჩემზე უფრო მკაცრი რუსეთთან

ბალტიისპირეთის ქვეყნის ლიდერები ამერიკის შეერთებული შტატების პრეზიდენტს შეხვდნენ. ლიტვის პრეზიდენტ დალია გრუბაუსკაიტესთან, ესტონეთის პრეზიდენტ კერსტი კალიულაიდთან და ლატვიის პრეზიდენტ რაიმონდს ვეიონისთან ერთად, პრეზიდენტმა დონალდ ტრამპმა პრესკონფერენცია გამართა. ამის შესახებ "ამერიკის ხმა" წერს.

"არავინ ყოფილა ჩემზე უფრო მკაცრი რუსეთთან", - განაცხადა ტრამპმა.

რუსეთის მიერ ყირიმის აგრესიის შემდეგ, ესტონეთს, ლატვიას და ლიტვას რუსეთის რეგიონული სამხედრო ექსპანსია კიდევ უფრო აშფოთებთ. სამი ქვეყანა მზადაა, გაზარდოს თავდაცვის ხარჯები, თუმცა მათ წინააღმდეგ აგრესიის შემთხვევაში, ისინი ნატოს მოკავშირეებს ეყრდნობიან.

ლიტვის პრეზიდენტმა, პრეზიდენტმა გრუბაუსკაიტემ პრესკონფერენციაზე განაცხადა, რომ მან პრეზიდენტ ტრამპთან იხუმრა, რომ ნატოს "სჭირდება ლიდერი, თუნდაც არაპროგნოზირებადი ლიდერი". "ჩვენ ვხედავთ მსგავს ლიდერობას პრეზიდენტ ტრამპისგან", - აღნიშნა მან.

მთავარი განსახილველი საკითხები თავდაცვა, კიბერუსაფრთხოება და ტერორიზმი იყო. ბალტიის ქვეყნები ამერიკისგან მუდმივ როტაციულ წარმომადგენლობას ითხოვენ ნატო-რუსეთის საზღვარზე. ტრამპმა რუსეთთან ურთიერთობაზეც ილაპარაკა და აღნიშნა, რომ მას შეუძლია რუსეთთან ურთიერთობების გამოსწორება.

"ვფიქრობ, შემიძლია რუსეთთან ძალიან კარგი ურთიერთობა მქონდეს და პრეზიდენტ პუტინთან, ეს კარგი იქნებოდა. მაგრამ ასევე არის დიდი შანსი იმის, რომ ეს არ მოხდება. ვინ იცის", - თქვა ტრამპმა.

პრეზიდენტმა დონალდ ტრამპმა კიდევ ერთხელ გაუსვა ხაზი ნატოს მოკავშირეების მხრიდან თავდაცვის ხარჯების გაზრდის აუცილებლობას.

„ჩვენ აღვნიშნავთ განახლებული პარტნიორობის 100 წლისთავს ჩვენს ქვეყნებს შორის“, - თქვა მან. ტრამპის განცხადებით, ბალტიისპირეთის ქვეყნებთან ერთად, ამერიკა „ორმხრივი ვაჭრობის და ინვესტიციების“ საკითხს განიხილავს. მისი თქმით, "ამერიკას აქვს ღრმა და ხანგრძლივი მეგობრული ურთიერთობა ბალტიის ქვეყნებთან".

ტრამპმა სამი ქვეყნის ლიდერს დამოუკიდებლობიდან 100 წლისთავი მიულოცა. "ჩვენ თქვენთან ვართ. ბალტიის ქვეყნები ერთგული მეგობრები და მოკავშირეები არიან", - აღნიშნა მან.

ცნობილი გახდა, რომ აშშ ბალტიისპირეთის ქვეყნებს 100 მილიონის იარაღით დაეხმარება.

2016 წლიდან მოყოლებული, პრეზიდენტმა ტრამპმა რამდენიმეჯერ გააკრიტიკა ნატოს წევრი ქვეყნები, რომლებიც, მისი თქმით, არ ასრულებენ თავდაცვითი ხარჯების ბიუჯეტის 2%-ით შესრულების პირობას. რამდენიმე თვის წინ ნატოში სიტყვით გამოსვლისას, პრეზიდენტმა ტრამპმა ნატოს ქარტიის მეხუთე მუხლი, რომელიც კოლექტიურ თავდაცვას ეხება, არ ახსენა. თუმცა, მოგვიანებით ამერიკის ვიცეპრეზიდენტმა მაიკ პენსმა ამერიკის მხრიდან ერთიანი თავდაცვის მხარდაჭერაზე იმსჯელა.