სირიელი კაცის ისტორია, რომელიც ერთი თვეა მალაიზიის აეროპორტში „ცხოვრობს“

სირიელი ჰასან ალ-კონტარის თქმით, ის ერთ თვეზე მეტია მალაიზიის აეროპორტის ტრანზიტულ სექციაში ჰყავთ გაჩერებული. მომხდარის მიზეზად კი ალ-კონტარი მის ქვეყანაში მიმდინარე სამოქალაქო ომს ასახელებს. ინფორმაციას BBC ავრცელებს.

როგორც სირიელი ამბობს, ის არაბთა გაერთიანებული საამიროებში მუშაობდა, თუმცა 2016 წელს სამსახურის დაკარგვის შემდეგ, დეპორტაციით მალაიზიაში მოხვდა. მისი თქმით, ის შეეცადა მალაიზიიდან კამბოჯაში ან ეკვადორში მოხვედრილიყო თუმცა უშედეგოდ. როგორც თავად ამბობს, სამი თვე მას მალაიზიის ტურისტული ვიზა ჰქონდა და ამ პერიოდის განმავლობაში ეკვადორში წასასვლელად აგროვებდა ფულს. მან Turkish Airways-ის ბილეთიც კი იყიდა, თუმცა გაუგებარი მიზეზით თვითმფრინავში ასვლის უფლება არ მისცეს. 

მოგვიანებით გაიგო, რომ მალაიზიაში დიდი ხნით გაჩერების გამო ის "შავ სიაში" მოხვდა, რის გამოც მას აღარც აეროპორტის დატოვება შეუძლია და ვერც იქიდან მიფრინავს სადმე. მისი თქმით, ის ტრანზიტულ სექციაში 7 მარტიდან "ცხოვრობს". 

ჰასან ალ-კონტარი დახმარებას ითხოვს: "შეუძლებელია უკვე აეროპორტში ცხოვრება. მე ადამიანი ვარ და არასწორად მიმაჩნია ომში მონაწილეობა. ომი ჩემი არჩევანი არ ყოფილა. მე არავინ მომიკლავს და არც სირიის დანგრევაში მინდა მონაწილეობა. არ მსურს ჩემს ხელებზე სისხლი იყოს. ომი გამოსავალი არასდროს არის, მაგრამ აღმოჩნდა, რომ იქიდან საიდანაც ვარ, ომის საფასურს ვიხდი", - უთხრა სირიელმა ჰასან ალ-კონტარმა BBC-ის.

მან სირია ჯერ კიდევ 2006 წელს დატოვა, რათა ჯარის სამსახურისთვის თავი აერიდებინა. ოჯახის სანახავად სირიაში მხოლოდ ერთხელ, 2008 წელს იყო ჩასული.

სირიაში სამოქალაქო ომი 2011 წლის 15 მარტს საპროტესტო აქციებით დაიწყო და აპრილში სამხედრო დაპირისპირებაში გადაიზარდა. 

პოლიტიკური თუ სოციალური მიზეზების გამო მსოფლიოს სხვადასხვა აეროპორტში მცხოვრები ადამიანების არაერთი ისტორია არსებობს. მაგალითად, ერთი ქალი უკვე 8 წელია სინგაპურის აეროპორტში მხოლოდ იმიტომ ცხოვრობს, რომ ბინის პრობლემა აქვს. ზიმბაბვეელების ოჯახი კი ბანგკოკის აეროპორტს თითქმის 7 თვეა ვერ ტოვებს. მათ სამშობლოში დაბრუნება პოლიტიკური დევნის გამო ეშინიათ, ტაილანდში კი მესაზღვრები არ უშვებენ.