ღაზის სექტორში შეტაკებები გრძელდება. დაღუპულია 35 პალესტინელი

საპროტესტო აქციები მარტის ბოლოს დაიწყო. ყოველ პარასკევს სიტუაცია მძაფრდება

30 მარტს, დღეს, როდესაც პალესტინელები დედამიწის დღეს აღნიშნავენ (1976 წელს 6 დაღუპულის პატივსაცემად, რომლებიც ისრაელისთვის პალესტინური მიწების გადაცემის გასაპროტესტებლად გამოვიდნენ აქციაზე), ღაზის სექტორის ათასობით მცხოვრები ისრაელის სასაზღვრო ღობესთან შეიკრიბა. ადგილობრივები ითხოვდნენ, რომ იძულებით გადაადგილებულ პალესტინელებს კუთვნილ საცხოვრებელ ტერიტორიაზე დაბრუნების უფლება მიეცეთ.

პროტესტების კიდევ ერთი საბაბი - ღაზის სექტორის ეკონომიკური და სამხედრო ბლოკადა, რომელიც 2000-იანი წლების დასაწყისიდან გრძელდება, როდესაც ტერიტორიაზე ძალაუფლება დაჯგუფება „ჰამასმა“ მოიპოვა, რომელიც მტრულად არის განწყობილი როგორც ისრაელის მიმართ, ასევე მოქმედი პალესტინური ავტონომიის. ბლოკადის შედეგად, ღაზაში ელექტროენერგია მხოლოდ 4 საათით მიეწოდება ადამიანებს, ხოლო სუფთა სასმელ წყალზე წვდომა მხოლოდ 10%-ს აქვს. 

აქციამდე, ისრაელის თავდაცვის მინისტრმა ავიგდორ ლიბერმანმა "თვითერზე" არაბულად დაწერა და ღაზას მაცხოვრებელი გააფრთხილა, არ მიეღოთ მონაწილეობა პროვოკაციაში, რადგან "ჰამასი" მათ "სიცოცხლეს რისკავს". 

აქციის მონაწილეებმა ისრაელი-ღაზის საზღვართან 5 ბანაკი გაშალეს. როგორც New York Times-ი წერს, უმეტესობა ადამიანი ბანაკში რჩებოდა და არც კი ცდილობდა ღობესთან მიახლოებას. ბანაკებში იმართება სპორტული და პოეზიის საღამოები და ხანდახა, იქ უფასო პიცასა და კექსებსაც არიგებენ. 

თუმცა არიან ისეთი აქტივისტები, რომლებიც პროტესტს უფრო ღიად გამოხატავენ. ისინი "მოლოტოვის კოქტეილებს" ესვრიან ისრაელ სამხედროებს. გარდა ამისა, პალესტინელი აქტივისტები წვავენ მანქანის საბურავებს, რითაც წარმოქმნიან კვამლს და საზღვარზე გადასვლას ფარულად ცდილობენ.

14 აპრილის მონაცემებით 35 ადამიანი დაიღუპა, დაშავდა ათასი

როგორც The New York Times-ი წერს, ისრაელელ სამხედროებს წესები აქვთ: ესროლონ შეიარაღებულ ადამიანს, რომელიც უახლოვდება ისრაელისა და ღაზის სექტორის გამყოფ ხაზს, 270 მეტრზე, ხოლო იარაღის არმქონეებს - 90 მეტრზე. 

ღაზის ჯანდაცვის სამინისტროს ცნობით, 14 აპრილისთვის ისრაელის სამხედროებმა უკვე მოკლეს 35 ადამიანი. ადგილობრივ მედიაში და სოცქსელებში გავრცელდა ვიდეო, რომელზეც ჩანს, როგორ ესვრის სნაიპერი მოზარდს, რომელიც საბურავს წვავს. ასევე ესვრიან აქტივისტს, რომელიც ღობისგან გაქცევას ცდილობს. 

ღაზის ხელისუფლება ცრემლსადენი გაზით, რეზინისა და ცეცხლსასროლი ტყვიების გამოყენებაზე ლაპარაკობს, რომლითაც ათასამდე ადამიანი დაშავდა. ისრაელის მხარე პალესტინელებს ფაქტების გაზვიადებაში სდებს ბრალს. გარდა ამისა, ისრაელი აცხადებს, რომ საზღვარზე გამართული აქციები, არ არის მშვიდობიანი.

"ღაზის სექტორში არ არიან უდანაშაულო ადამიანები. ისინი ყველანი ჰამასთან არიან დაკავშირებული და ამაში ფულს იღებენ", - განაცხადა ისრაელის თავდაცვის მინისტრმა ლიბერმანმა. 

საერთაშორისო ორგანიზაციები ისრაელის ხედვას არ იზიარებს. ევროპული კავშირი თელ-ავივს "თავის შეკავებას" სთხოვს. 8 აპრილს ჰააგის სისხლის სამართლის საერთაშორისო სასამართლოს პროკურორმა ფატუ ბენსუდამ განაცხადა, რომ ისრაელის ქმედებები ღაზის სექტორის მოქალაქეების მიმართ შესაძლოა სამხედრო დანაშაულს გაუთანაბრონ. გაეროში ღაზის სექტორში განვითარებულ მოვლენებზე გამოძიების განცხადება აშშ-მა დაბლოკა. 

7 აპრილს სექტორის საზღვართან მასობრივი დემონსტრაციის დროს ისრაელის ძალებმა პალესტინელი ჟურნალისტი მოკლეს. 30 წლის გარდაცვლილი ჟურნალისტი ჰალილ აბუ ატირა სააგენტო Ain Media-ში მუშაობდა და სამუშაოს შესრულების დროს პრესის აღმნიშვნელი ჟილეტი ეცვა.

ისრაელის მხარეს მსხვერპლის შესახებ ინფორმაცია არ ვრცელდება. 

კონფლიქტი სუსტდება, თუმცა ძალადობა გრძელდება 

როგორც The New York Times-ი წერს, ეს დანაკარგები გაცილებით ნაკლებია, ვიდრე ადრინდელ პროტესტებს მოჰყვებოდა. ისრაელში აცხადებენ, რომ პალესტინელები უფრო მეტად უფრთხილდებიან საკუთარ სიცოცხლეს და ამიტომაც არ იწვევენ კონფლიქტს. 

ღაზის სექტორში საპროტესტო აქციები გეგმის მიხედვით 15 მაისს უნდა დასრულდეს. ორგანიზატორების თქმით, სწორედ ამ დღეს ათასობით პალესტინელმა უნდა გაარღვიოს საზღვარი ისრაელის მიწაზე "დაბრუნების მარშით" შევიდნენ.