ჩრდილოეთ კორეა ბირთვული ცდების ჩასატარებელ პოლიგონს მაისში დახურავს

ჩრდილოეთ კორეა ბირთვულ პროგრამას მაისში შეაჩერებს და რაკეტების გამოცდას აღარ აპირებს,- ამის შესახებ სამხრეთ კორეის პრეზიდენტის ადმინისტრაციაში განაცხადეს. ინფორმაციას BBC ავრცელებს.

როგორც სეულში აცხადებენ ბირთვული ცდების ჩასატარებელი პოლიგონის დახურვის პროცესს ამერიკელი და სამხრეთ კორეელი ექსპერტები დაესწრებიან და ის საჯარო იქნება. 

მანამდე ჩრდილოეთ და სამხრეთ კორეის ლიდერები ბირთვულ განიარაღებასა და პოლიგონის დახურვაზე შეთანხმდნენ. ხსენებულ პოლიგონზე 2006 წლის შემდეგ ბირთვული რაკეტა ექვსჯერ გამოსცადეს.

ჩინეთის მეცნიერებისა და ტექნოლოგიების უნივერსიტეტის პროფესორები ასკვნიან, რომ პუნგერის პოლიგონი მწყობრიდან გასულ წელს წყალბადის ბომბის გამოცდის დროს გამოვიდა. მაშინ გვირაბის ჩამონგრევის შედეგად 200 ადამიანი დაიღუპა.

ჩრდილოეთ და სამხრეთ კორეას შორის საომარი მოქმედებები 1953 წელს დასრულდა, თუმცა სამშვიდობო შეთანხმება მას შემდეგ არ გაფორმებულა და ქვეყნები ტექნიკურად საომარ მდგომარეობაში იმყოფებიან.

კიმ ჩენ ინი პირველი ჩრდილოეთ კორეელი ლიდერია 1953 წლის შემდეგ, რომელმაც ომის შემდეგ ნახევარკუნძულის გამყოფი სამხედრო ხაზი გადაკვეთა. 

ამერიკის შეერთებული შტატების პრეზიდენტის დონალდ ტრამპისა და ჩრდილოეთ კორეის ლიდერის კიმ ჩენ ინის შეხვედრის პერსპექტივის შესახებ 9 მარტს გახდა ცნობილი. გავრცელებული ინფორმაციით, ისინი ერთმანეთს მაისის ბოლოს შეხვდებიან.