უკრაინა აცხადებს, რომ რუსეთის თავდასხმის 47 პოტენციური სამიზნის სია აღმოაჩინა

უკრაინის ხელისუფლება იუწყება, რომ აღმოაჩინეს რუსეთის სამიზნეების 47-კაციანი სია, რომელიც ძირითადად ჟურნალისტებისგან შედგება. ამის შესახებ რადიო თავისუფლება წერს.

უკრაინის გენერალური პროკურორის, იური ლუცენკოს ცნობით სია მოიპოვეს სპეცოპერაციის შედეგად, რომლის ნაწილიც იყო რუსი ჟურნალისტის, არკადი ბაბჩენკოს მკვლელობის ინსცენირება. ლუცენკოს განცხადებით, 47-ვე ადამიანის უსაფრთხოების უზრუნველყოფის ზომებია მიღებული.

„ეხო მასკვის“ თანამშრომელმა მატვეი განაპოლსკიმ ეთერში განაცხადა, რომ ის და კიდევ ერთი ცნობილი ჟურნალისტი ევგენი კისელიოვი დაიბარეს უკრაინის უშიშროების სამსახურებმა და გააფრთხილეს მოსალოდნელი რისკის შესახებ.

29 მაისს კიევში რუს ჟურნალისტ არკადი ბაბჩენკოზე თავდასხმისა და მკვლელობის შესახებ ინფორმაცია გავრცელდა.

გავრცელებული ინფორმაციით, არკადი ბაბჩენკო უცნობმა პირმა ცეცხლსასროლი იარაღიდან გასროლით მოკლა. პოლიციის ცნობით, ჟურნალისტი ზურგში მიყენებული ცეცხლსასროლი ჭრილობით თავის ბინაში ცოლმა აღმოაჩინა. 

30 მაისს ცნობილი გახდა, რომ მკვლელობა ინსცენირებული იყო.

ბაბჩენკო უკრაინის უსაფრთხოების სამსახურში გამართულ პრესკონფერენციაზე გამოჩნდა.

როგორც უწყებაში აცხადებენ, პირი, რომელიც მასზე თავდასხმას გეგმავდა უკრაინის მოქალაქეა, რომელიც რუსულმა სპეცსამსახურებმა გადაიბირეს. ის დაკავებულია.

სპეცსამსახურის წარმომადგენლების განცხადებით, მათ იცოდნენ, რომ ჟურნალისტზე თავდასხმა იგეგმებოდა, ხოლო მისი გარდაცვლილად გამოცხადება სპეცოპერაციის ნაწილი იყო.

პრესკონფერენციაზე ბაბჩენკომ სპეცოპერაციაში საიდუმლო მონაწილეობისთვის ბოდიში მოიხადა, რადგან ამის შესახებ მისმა ცოლმაც კი არ იცოდა.

„რეპორტიორები საზღვრებს გარეშე“ ბაბჩენკოს სიკვდილის ინსცენირებას უარყოფითად აფასებს.