უკრაინაში ბაბჩენკოს მკვლელობაში ეჭვმიტანილი პატიმრობაში დატოვეს

კიევის სასამართლომ პატიმრობაში დატოვა ბორის ჰერმანი, რომელიც ეჭვმიტანილია რუსი ჟურნალისტის, არკადი ბაბჩენკოს მკვლელობის დაგეგმვაში. ამის შესახებ რადიო თავისუფლება წერს.

გავრცელებული ცნობებით, ჰერმანმა ამ მიზნით 40,000 ამერიკული დოლარი შესთავაზა დაქირავებულ მკვლელს. უკრაინის უშიშროების სამსახური აცხადებს, რომ აღკვეთა მკვლელობის გეგმა, ბაბჩენკოსთან თანამშრომლობით და მისი მკვლელობის ინსცენირებით.

ბაბჩენკოს თქმით, ჰერმანმა მკვლელობისთვის ფული მაშინ გადაიხადა, როცა "მკვლელობის" შესახებ ცნობები გავრცელდა. უკრაინის გენერალურმა პროკურორმა, იური ლუცენკომ სატელევიზიო გამოსვლაში თქვა, რომ ჰერმანის მიერ დაქირავებული პირი იყო ალექსეი ციმბალიუკი, რომელიც მანამდე აღმოსავლეთ უკრაინის კონფლიქტში იბრძოდა.

მანამდე ლუცენკოს ნათქვამი აქვს, რომ პირი, რომელსაც ბაბჩენკო უნდა მოეკლა, გამოძიებასთან თანამშრომლობდა და მას მოწმის სტატუსი აქვს. რუსეთი გმობს ბაბჩენკოს მკვლელობის ინსცენირებას და საერთაშორისო უფლებადამცველ ორგანიზაციებს მოქმედებისკენ მოუწოდებს.

ასევე უკრაინის ხელისუფლება იუწყება, რომ აღმოაჩინეს რუსეთის სამიზნეების 47-კაციანი სია, რომელიც ძირითადად ჟურნალისტებისგან შედგება.

29 მაისს კიევში რუს ჟურნალისტ არკადი ბაბჩენკოზე თავდასხმისა და მკვლელობის შესახებ ინფორმაცია გავრცელდა.

გავრცელებული ინფორმაციით, არკადი ბაბჩენკო უცნობმა პირმა ცეცხლსასროლი იარაღიდან გასროლით მოკლა. პოლიციის ცნობით, ჟურნალისტი ზურგში მიყენებული ცეცხლსასროლი ჭრილობით თავის ბინაში ცოლმა აღმოაჩინა. 

30 მაისს ცნობილი გახდა, რომ მკვლელობა ინსცენირებული იყო. ბაბჩენკო უკრაინის უსაფრთხოების სამსახურში გამართულ პრესკონფერენციაზე გამოჩნდა.როგორც უწყებაში აცხადებენ, პირი, რომელიც მასზე თავდასხმას გეგმავდა უკრაინის მოქალაქეა, რომელიც რუსულმა სპეცსამსახურებმა გადაიბირეს. ის დაკავებულია.

სპეცსამსახურის წარმომადგენლების განცხადებით, მათ იცოდნენ, რომ ჟურნალისტზე თავდასხმა იგეგმებოდა, ხოლო მისი გარდაცვლილად გამოცხადება სპეცოპერაციის ნაწილი იყო. პრესკონფერენციაზე ბაბჩენკომ სპეცოპერაციაში საიდუმლო მონაწილეობისთვის ბოდიში მოიხადა, რადგან ამის შესახებ მისმა ცოლმაც კი არ იცოდა.

„რეპორტიორები საზღვრებს გარეშე“ ბაბჩენკოს სიკვდილის ინსცენირებას უარყოფითად აფასებს.