რუსეთის საგარეო უწყებამ ჟენევის მოლაპარაკებების 44-ე რაუნდი შეაფასა

რუსეთის საგარეო უწყება ჟენევის მოლაპარაკებების 44-ე რაუნდზე განცხადებას ავრცელებს, რომელიც 19-20 ივნისს გაიმართა.

უწყების ცნობით, მასში საქართველოს, ოკუპირებული აფხაზეთისა და სამხრეთ ოსეთის, რუსეთისა და აშშ-ის წარმომადგენლები მონაწილეობდნენ, თანათავჯდომარეები კი გაერო, ეუთო და ევროკავშირი იყვნენ.

„რუსულმა დელეგაციამ ხაზი გაუსვა იმ გარემოებას, რომ ჟენევის ფორმატის უფრო ეფექტურად მუშაობისთვის ერთადერთი საშუალება ისაა, რომ საქართველოს წარმომადგენლებმა პირდაპირი პატივსაცემი დიალოგი გამართონ აფხაზეთისა და სამხრეთ ოსეთის წარმომადგენლებთან, რომლებაც უარი თქვეს კონფრონტაციულ და პროპაგანდისტულ აქციებზე სხვა საერთაშორისო არენაზე"- ნათქვამია საგარეო საქმეთა სამინისტროს განცხადებაში.

როგორც უწყება წერს, ქართულმა მხარემ ეს მოწოდება არ გაიზიარა და შეეცადა რუსეთის მიერ აფხაზეთისა სამხრეთ ოსეთის ოკუპაციაზე გაემახვილებინა ყურადღება და ასევე პოლიტიკურ ჭრილში ეჩვენებინა თავისი მოქალაქეების არჩილ ტატუნაშვილის, გიგა ოთხოზორისა და დავით ბაშარულის გარდაცვალების ფაქტები.

ამასთან, რუსეთის საგარეო უწყების განცხადებაში აღნიშნულია, რომ „საქართველოს წარმომადგენლების გარდა, დისკუსიის ყველა მონაწილე შეთანხმდა, რომ სასაზღვრო ზონაში ვითარება სტაბილური და კონტროლირებადია. ამას ცხადყოფს აფხაზეთისა და სამხრეთ ოსეთის საქართველოსთან არსებული საზღვრების სტატისტიკა.“

განცხადებაში ასევე ნათქვამია, რომ მოლაპარაკებების დროს რუსეთმა, ასევე აფხაზეთისა და სამხრეთ ოსეთის დეფაქტო მთავრობების წარმომადგენლებმა რეგიონში ნატოს წარმომადგენლების გააქტიურებასთან დაკავშირებით უკმაყოფილება გამოთქვეს. რუსეთის საგარეო საქმეთა სამინისტროს განცხადების მიხედვით, მოსკოვი, სოხუმი დ ცხინვალი საპახუხო ზომების მისაღებად უფლებას იტოვებენ.

რუსეთის საგარეო უწყების ინფორმაციითვე, ძალის გამოუყენებლობაზე ერთობლივი შეთანხმების პროექტზე კონსტიუქციული დიალოგი ვერ შედგა. „ქართული მხარე მოითხოვდა ამერიკულ ვარიანტზე მუშაობის გაგრძელებას, რომელიც აფხაზებსა და ოსებს ფაქტობრივად ამ დოკუმენტს მიღმა ტოვებს"- ნათქვამია განცხადებაში.

ჟენევაში საერთაშორისო მოლაპარაკებების მორიგი რაუნდი 19 ივნისს დაიწყო. შეხვედრის ერთ-ერთი მთავარი თემა არჩილ ტატუნაშვილის საქმე და რუსეთის მიერ ცეცხლის შეწყვეტისა და ძალის გამოუყენებლობის შესახებ დადებული შეთანხმების შესრულების ვალდებულება იყო.

მარტის ბოლოს ჟენევაში მოლაპარაკების 43-ე რაუნდი გაიმართა, თუმცა მხარეებმა ერთობლივ განცხადებაზე შეთანხმებას ვერ მიაღწიეს. მომდევნო შეხვედრა მიმდინარე წლის ოქტომბერში გაიმართება.