ტაილანდელმა ბიჭებმა პირველად ისაუბრეს მღვიმეში გატარებულ დღეებზე

ტაილანდის გამოქვაბულიდან ამოყვანილი 12 ფეხბურთელი და მათი მწვრთნელი ცოტა ხნის წინ გაწერეს საავადმყოფოდან. ექიმების თქმით, ბიჭებმა, რამდენიმე დღეში, საშუალოდ, 3 კილოგრამი მოიმატეს და ჩატარებულმა ანალიზებმაც დამაკმაყოფილებელი შედეგი აჩვენა. ცოტა ხნის წინ მათ პრესკონფერენცია გამართეს და მედიასთან ის დღეები გაიხსენეს, როცა გამოქვაბულში იყვნენ. ამის შესახებ Independent-ი წერს.

ერთ-ერთმა სპორტსმენმა, 14 წლის ადულ სამ-ონმა თქვა: „მეშინოდა, რომ ვეღარასდროს დავბრუნდებოდი სახლში და ვეღარ ვნახავდი ჩემს ოჯახს“. 

„ჩვენ გამოქვაბულში შემაღლებულ ადგილს შევაფარეთ თავი. უცებ, ჩვენმა მწვრთნელმა თქვა, რომ ვიღაცის ლაპარაკი მოესმა. ჩვენ არაფერი გაგვიგია, ამიტომ გავჩუმდით და ყური დავუგდეთ. ეს სიმართლე აღმოჩნდა. გაოცებულები ვიყავით. მწვრთნელმა ერთ ბიჭს უთხრა, ქვემოთ ჩასულიყო და შეემოწმებინა, ვინ იყო, ეჩქარა, ვიდრე ისინი მათ გასცდებოდნენ. 

ბიჭი ჩავიდა შემაღლებული ადგილიდან ინგლისურად დაიძახა „გამარჯობა“ (Hello)“.

სწორედ ამ დროს შეიტყვეს გამოქვაბულში ჩარჩენილებმა, რომ მათ დასახმარებლად მაშველები მივიდნენ. 

ბიჭებმა ისიც თქვეს, რომ მაშველების გამოჩენამდე კედლების გამოთხრას ცდილობდნენ. „ჩვენ არ გვინდოდა, გვეცადა, როდის გვიპოვიდა ხელისუფლება“ - თქვა ერთ-ერთმა ბიჭმა. 

ბიჭებმა სამაშველო სამუშაოებისას დაღუპული უფროსი სერჟანტი, მყვინთავი, 38 წლის სამან გუმანიც გაიხსენეს. ერთ-ერთმა ბიჭმა მყვინთავის სურათს მიმართა: „მადლობა, რომ მოხვედით ჩვენ გადასარჩენად. ვწუხვარ თქვენი ოჯახის გამო. მშვიდობით განისვენეთ. თქვენ ყოველთვის ჩემს გულში იქნებით. ვწუხვარ კიდევ ერთხელ“ - თქვა ბიჭმა. 

მწვრთნელმა კი დაამატა: „ეს ამბავი ყველამ ძალიან განიცადა. ბიჭები ამაში საკუთარ თავს ადანაშაულებდნენ, თითქოს მათი ბრალი იყო მყვინთავის დაღუპვა და მათი ოჯახების განსაცდელი“. 

პრესკონფერენციას ტაივანის იუსტიციის მინისტრი, ტავაჩაი ტაიკაუც ესწრებოდა. 

„ჩვენ ჯერ კიდევ არ ვიცით, რა ჭრილობას ინახავენ ეს ბიჭები საკუთარ გულებში“ - თქვა მან. 

ერთ-ერთმა სპორტსმენმა შეხვედრის დასასრულს თქვა: „ბოდიში, რომ ვიყავი ცელქი ბიჭი. აღარასდროს გავეკარები გამოქვაბულებს“.

12-მა ტაილანდელმა ბიჭმა, რომლებმაც მწვრთნელთან ერთად გამოქვაბულში 17 დღე გაატარა თქვეს, რომ თავს კარგად გრძნობენ. 

10 ივლისს, გამოქვაბულში ჩარჩენილი 12 მოზარდისა და მათი მწვრთნელის სამაშველო ოპერაცია წარმატებით დასრულდა.

ტაილანდის გამოქვაბული 23 ივნისის შემდეგ მსოფლიო მედიის ყურადღების ცენტრშია. 11-დან 16 წლამდე ფეხბურთელები და მათი 25 წლის მწვრთნელი მღვიმეში შევიდნენ, თუმცა იქ ყოფნის დროს ძლიერი წვიმა მოვიდა, წყლის დონემ აიწია და გასასვლელი ჩაკეტა, რის გამოც ბავშვები გამოქვაბულის სიღრმეში აღმოჩდნენ. 

2 ივლისს ისინი აშშ-ისა და ბრიტანეთის მაშველთა დახმარებით ცოცხლები იპოვეს.