მანაფორტის ყოფილმა თანამშრომელმა მის წინააღმდეგ ჩვენება მისცა

დონალდ ტრამპის წინასაარჩევნო შტაბის ყოფილი ხელმძღვანელის პოლ მანაფორტის საქმის ერთ-ერთმა მთავარმა მოწმემ რიკ გეიტსმა მანაფორტის წინააღმდეგ ჩვენება მისცა. ეს მოწმე მანაფორტის თანამშრომელი იყო. ინფორმაციას BBC ავრცელებს.

მოწმემ თქვა, თუ როგორ დაეხმარა მანაფორტი ყოფილ ბიზნესპარტნიორს გადასახადების დამალვაში და როგორ მოიპარეს ფული. BBC-ის ცნობით, პოლ მანაფორტის ყოფილი საქმიანი პარტნიორი და თანამშრომელი რიკ გეიტი მზად არის გამოძიებასთან ითანამშრომლოს. გეიტს რამდენიმე ათასიანი ჯარიმა და 5-დან 15 წლამდე პატიმრობა ემუქრება.

გეიტსის თქმით, ის ისე იქცეოდა, როგორც მისი უფროსი მანაფორტი ეუბნებოდა. მან ასევე აღიარა მთელი რიგი დანაშაულები, რომლებიც უკრაინაში მუშაობის დროს 2006-2014 წლებში ჩაიდინა.

როგორც "რადიო თავისუფლება" წერს, პოლ მანაფორტის უკრაინელი კლიენტების სიაში პირველ ადგილზეა მილიარდერი რინატ ახმეტოვი, რომელიც უკრაინის ყოფილი პრეზიდენტის, ვიქტორ იანუკოვიჩის „რეგიონების პარტიის“ მთავარი სპონსორი იყო. ამავე სიაშია იანუკოვიჩის ადმინისტრაციის ყოფილი უფროსი, მილიონერი სერგეი ლავოჩკინი, რომელმაც პოლ მანაფორტს პოლიტიკური კონსულტაციებისთვის რამდენიმე მილიონი დოლარი გადაუხადა კვიპროსის ოფშორული კომპანიების მეშვეობით. მანაფორტის კლიენტებს შორისაა რუსი ოლიგარქი ოლეგ დერიპასკაც, რომელმაც კვიპროსზე გადარიცხა 10 მილიონი დოლარი.

დონალდ ტრამპის წინასაარჩევნო შტაბის ყოფილი ხელმძღვანელის პოლ მანაფორტის სასამართლო პროცესი 31 ივლისს დაიწყო. 

მანაფორტი ტრამპის საარჩევნო შტაბის ხელმძღვანელი იყო მანამ, სანამ თანამდებობას დატოვებდა რუს და უკრაინელ ოლიგარქებთან მისი კავშირების გამოაშკარავების გამო.პოლ მანაფორტი ათი წლის განმავლობაში მუშაობდა უკრაინაში პოლიტიკურ კონსულტანტად. 2016 წლის აგვისტოში ის უკრაინაში პრორუსულ წრეებთან კავშირებში დაადანაშაულეს. იმავდროულად, მანაფორტი ესწრებოდა მნიშვნელოვან შეხვედრას რუს ადვოკატთან, რომელიც შესაძლოა ცდილობდა ტრამპის შტაბისთვის დემოკრატებზე საიდუმლო ინფორმაციის მიწოდებას.

ადრე სპეცპროკურორმა გამოაქვეყნა სია 500 მტკიცებულებისა, რომლების წარმოდგენასაც აპირებს სასამართლოში. თავად მანაფორტი უარყოფს ყველა ბრალდებას. 

2016 წლის დეკემბერში, აშშ-ის სპეცსამსახურებმა მოამზადეს სპეციალური ანგარიში ამერიკულ არჩევნებში რუსეთის ჩარევის შესახებ. რის შემდეგაც, კონგრესის სამმა კომიტეტმა და სპეციალურმა პროკურორმა, FBI-ის ყოფილმა დირექტორმა რობერტ მიულერმა საქმის გამოძიება დაიწყეს.

გამოძიების ფარგლებში ამოწმებენ ინფორმაციას დონალდ ტრამპის და მისი გარემოცვის რუსეთის ხელისუფლებასთან კავშირებზე. ამ საქმის ფიგურანტები არიან ტრამპის წინასაარჩევნო შტაბის ყოფილი უფროსი პოლ მანაფორტი და ტრამპის ყოფილი მრჩეველი მაიკლ ფლინი. პრეზიდენტის წინააღმდეგ მტკიცებულებების აღმოჩენის შემთხვევაში ეს შეიძლება მისი იმპიჩმენტის საფუძველი გახდეს.