მაიკლ კოენის წინააღმდეგ თაღლითობის ბრალდებით გამოძიება დაიწყო

დონალდ ტრამპის ყოფილი ადვოკატის, მაიკლ კოენის მიერ შესაძლო საბანკო თაღლითობის საქმეზე გამოძიება დაიწყო. ამის შესახებ The New York Times-ი წერს. 

გამოძიება მას 2014 წელს $20-მილიონიანი საბანკო სესხის თაღლითობის გზით მიღებას ედავება. გამოძიების ინფორმაციით, კოენმა ტაქსების საკუთარი კომპანიის აქტივების ღირებულება გააყალბა, იმისთვის რომ ორი ფინანსური ისტიტუტისგან - Sterling National Bank-დან და Melrose Credit Union-დან, ჯამში, $20 მილიონამდე სესხი მიეღო. 

ასევე, გამომძიებლები მუშაობენ იმის დასადგენად, აყალბებდა თუ არა კოენი ოჯახის კუთვნილი ბიზნესის მთლიანი შემოსავლის მონაცემებს და ატყუებდა თუ არა საშემოსავლო სამსახურს. 

ბოლო დროს აშშ-ის პრეზიდენტსა და მის ყოფილ ადვოკატს შორის ურთიერთობა დაიძაბა. მაიკლ კოენმა საიდუმლოდ ჩაწერა თავისი კლიენტის საუბარი, რომელიც Playboy-ს ყოფილი მოდელისთვის ფულის მიცემას ეხებოდა. გავრცელებული ინფორმაციით, ჩანაწერები კოენის საადვოკატო ფირმაში FBI-ს რეიდის შემდეგ იპოვეს. ჩანაწერი არჩევნებამდე 2 თვით ადრე თარიღდება. 

ტრამპის ირგვლივ სექს-სკანდალი რამდენიმე თვის წინ აგორდა. 17 მარტს აშშ-ის პრეზიდენტ დონალდ ტრამპის ადვოკატმა მაიკლ კოენმა პორნომსახიობ სტეფანი კლიფორდს სასამართლოში უჩივლა. სარჩელში ნათქვამია, რომ ქალმა ტრამპთან ურთიერთობა, გაუხმაურებლობაზე შეთანხმების მიუხედავად, გაასაჯაროვა.

13 მარტს სტეფანი კლიფორდმა განაცხადა, რომ ის მზად არის დონალდ ტრამპს 130 ათასი დოლარი დაუბრუნოს, რაც დუმილის სანაცვლოდ მიიღო. 8 მარტს ტრამპმა პორნოვარსკვლავთან სასამართლო საქმე მოიგო.

მანამდე კი აშშ-ის პრეზიდენტის ადვოკატმა პორნოვარსკვლავისთვის თანხის გადახდა აღიარა. მაიკლ კოენის თქმით, ფაქტი 2016 წელს მოხდა და მილიარდერ დონალდ ტრამპის ადვოკატმა პორნოვარსკვლავ სტეფანი კლიფორდს, რომლის სასცენო ფსევდონიმია სტორმი დენიელსი, შეთანხმების ფარგლებში 130 ათასი დოლარი გადაუხადა. 

ეს განცხადება მას შემდეგ გაკეთდა, რაც ამ ინფორმაციამ ამერიკულ მედიაში გაჟონა. კოენმა ეს ცნობა თავდაპირველად უარყო. თუმცა, რამდენიმე კვირის შემდეგ, ფაქტი აღიარა.

ამავე ისტორიაში გაეხვია მოდელი კარენ მაკდუგალიც.  კარენ მაკდუგალმა სასამართლოს მიმართა თხოვნით, თეთრი სახლის ლიდერთან ინტიმური ურთიერთობა გაასაჯაროოს. მას ხელშეკრულება აქვს დადებული, რომ რომანი საიდუმლოდ უნდა შეენახა. ამისთვის კი 150 ათასი დოლარი გადაუხადეს.