მაიკლ კოენმა აღიარა, რომ ტრამპის მითითებით დანაშაულს სჩადიოდა

აშშ-ის პრეზიდენტის ყოფილმა ადვოკატმა მაიკლ კოენმა აღიარა, რომ დონალდ ტრამპის დავალებით ფული გადაუხდა ორ ქალს, რომლებთანაც მის კლიენტს ინტიმური ურთიერთობა ჰქონდა. ამის შესახებ Twitter-ზე კოენის ადვოკატმა ლენი დევიდსმა დაწერა.

„დღეს [კოენმა] სასამართლოს წინაშე განაცხადა, რომ დონალდ ტრამპმა მას დაავალა ჩაედინა დანაშაული და ფული გადაეხადა ორი ქალისთვის, რათა ამით არჩევნების შედეგებზე გავლენა მოეხდინა. თუ ეს ნაბიჯი კოენს დანაშაულად ეთვლება, რატომ არ ეთვლება ის დანაშაულად დონალდ ტრამპს?“, - დაწერა დევისმა.

CNN-ის ინფორმაციით, 21 აგვისტოს კოენი FBI-ის ჩაბარდა და გამოძიებასთან საპროცესო შეთანხმება გააფორმა. ის ნიუ-იორკის სასამართლოში გადაიყვანეს, სადაც ბრალდების 8 ეპიზოდში თავი დამნაშავედ ცნო, მათ შორის პოლიტიკური კამპანიის დაფინანსების წესის დარღვევაში.

კოენმა აღიარა, რომ „ფედერალური თანამდებობის კანდიდატის“ დავალებით მალავდა ინფორმაციას, რომელიც მის კლიენტს დააზიანებდა. სასამართლოში კოენმა ტრამპის გვარი არ ახსენა, თუმცა CNN აღნიშნავს, რომ სასამართლოს დოკუმენტებში ის ნახსენებია როგორც „მოქალაქე ნომერი ერთი“, რომელიც 2017 წლის იანვარში აშშ-ის პრეზიდენტი გახდა.

Associated Press-ის ცნობით, კოენის საქმეზე განაჩენი 12 დეკემბერს გამოცხადდება. ადვოკატს 4-5 წლით პატიმრობა ემუქრება.

ამერიკული პრესის მონაცემებით, მაიკლ კოენმა პორნომსახიობ სტეფანი კლიფორდს (სტორმი დენიელსი) 130 ათასი დოლარი გადაუხადა. ადვოკატი დაკავშირებულია ასევე Playboy-ის მოდელ კარენ მაკდუგალისთვის 150 ათასი დოლარის გადახდასთან. ეს მას შემდეგ მოხდა, რაც 2016 წლის საარჩევნო კამპანიის დროს ქალებმა განაცხადეს, რომ ტრამპთან ურთიერთობის შესახებ საზოგადოებას უამბობდნენ. სასამართლოს დოკუმენტებში კლიფორდი და მაკდუგალი არ სახელდებიან.   

მაიკლ კოენის წინააღმდეგ სისხლის სამართლის საქმე 2018 წლის გაზაფხულზე აღძრეს. ივნისში ცნობილი გახდა, რომ ის ტრამპის ადვოკატი აღარ არის.