რომის პაპმა სასულიერო პირთა სექსუალური ძალადობის მსხვერპლებს პატიება სთხოვა

რომის პაპი ფრანცისკე სასულიერო პირების მიერ სექსუალური ძალადობის მსხვერპლებს შეხვდა, მათ მოუბოდიშა და კიდევ ერთხელ გამოთქვა სამართლიანობის აღდგენის სურვილი. ამის შესახებ მან ირლანდიაში ოფიციალური ვიზიტის ფარგლებში თქვა. ინფორმაციას BBC ავრცელებს.

პაპი ფრანცისკეს განცხადებით, ისტორიები, თუ როგორ ძალადობდნენ სასულიერო პირები ახალგაზრდა ადამიანებზე, რომლებსაც მტკივნეული მოგონებები დაუტოვეს, მსმენელს ვერ ტოვებს გულგრილს.

პაპმა სასულიერო პირების მსგავსი ქმედებები კიდევ ერთხელ დაგმო.

რომის პაპის ირლანდიაში ვიზიტი ოჯახების შეხვედრის მასშტაბურ ღონისძიებას ემთხვევა, რომელიც ყოველ სამ წელში ერთხელ იმართება. ღონისძიების ფარგლებში დღეს მასშტაბური მესა აღევლინება, რომელსაც 500,000 ადამიანი დაესწრება. რომის პაპის ორდღიანი ვიზიტი ირლანდიაში 25 აგვისტოს დაიწყო. 

მანამდე წერილით, რომლითაც პაპმა ფრანცისკემ 1.2 მილიარდ კათოლიკეს მიმართა ეკლესიის სახელს ამოფარებული პედოფილი მღვდლების საქციელი დაგმო. 

თითქმის 40 წლის წინ ირლანდიას ბოლოს რომის პაპის რანგში იოანე-პავლე II ეწვია. 

რამდენიმე დღის წინ რომის პაპმა საეკლესიო საზოგადოებას მოუწოდა გაუმკლავდეს სირთულეებს და მომხდარის გამო პატიება ითხოვონ. 

15 აგვისტოს პენსილვანიის უზენაესმა სასამართლომ ნაფიც მსაჯულთა ანგარიში გამოაქვეყნა, რომელშიც კათოლიკური ეკლესიის 300-მდე საეკლესიო პირი სექსუალურ ძალადობაში დამნაშავედ ცნო. დოკუმენტი ბოლო 70 წლის მოვლენებს ასახავს. ამ ხნის განმავლობაში სექსუალური ძალადობის მსხვერპლი 1000-ზე მეტი ბავშვი გახდა.

ამის შემდეგ ვატიკანმა გამოაქვეყნა განცხადება, სადაც წერდა, რომ პაპი ფრანცისკე მსხვერპლთა გვერდით დგას და ის პედოფილ საეკლესიო მსახურებს მტაცებლებად მიიჩნევს. 

9 აგვისტოს, Willow Creek-ის საეკლესიო პირებმა თანამდებობები მათი ლიდერის სექსუალური სკანდალის გამო დატოვეს. 

მანამდე აშშ-ის კათოლიკური ეკლესიის ერთ-ერთი ყველაზე ცნობილი ფიგურა სექსუალური ძალადობის სკანდალში გაეხვა, რის გამოც რომის პაპმა ფრანცისკემ კარდინალ თეოდორ მაკარიკის საეკლესიო წოდება ჩამოართვა.