კარინ კნაისლი: პუტინთან ცეკვა სანქციების პოლიტიკას არ შეცვლის

ავსტრია ტანდემში მუშაობს ევროკავშირელ პარტნიორებთან იმ საკითხებში, რაც რუსეთს შეეხება. ამის შესახებ ავსტრიულ გაზეთთან Der Standard ინტერვიუში კარინ კნაისლმა განაცხადა.

ავსტრიის საგარეო საქმეთა მინისტრმა ჟურნალისტთან საუბარში აღიარა, რომ თავის ქორწილში ვლადიმერ პუტინის დაპატიჟება სპონტანური გადაწყვეტილება იყო. „5 ივლისს პუტინი ჩემს ქორწილში დავპატიჟე. მანამდე მასთან მთელი დღე მქონდა კონტაქტი. გარდა ამისა, მე შევხვდი მას სერიოზული მოლაპარაკებების დაწყებს წინ - რუსეთის პრეზიდენტს აინტერესებდა, რას ვფიქრობ ახლო აღმოსავლეთში შექმნილ სიტუაციაზე“, - ამბობს მინისტრი.

„პუტინთან შეხვედრამდე მე ოფისში შევიარე და ქორწილის მოსაწვევები ავიღე, რომელიც მინდოდა იმ ღონისძიებაზე დამერიგებინა, სადაც საღამოს ჩემს საქმროსთან ერთად მივდიოდი. მოსაწვევი გადავეცი პრეზიდენტს, კანცლერს და მთავრობაში რამდენიმე ჩემს მეგობარს“, - განაცხადა კნაისლმა.

მისი განმარტებით, სრულიად სპონტანურად მას მოუნდა, რომ თავისი ბედნიერება პუტინისთვის გაეზიარებინა და მისთვის საქმრო გაეცნო. მას რამდენიმე მოსაწვევი დარჩა და ერთ-ერთი რუსეთის ლიდერს გადასცა.

რამდენიმე კვირის შემდეგ კნაისლს რუსეთის საგარეო საქმეთა სამინისტროდან აცნობეს, რომ პუტინმა მიწვევა მიიღო და ქორწილს დაესწრება. „ეს ჩემთვის უდიდესი მოულოდნელობა იყო“, - აცხადებს მინისტრი.

კნაისლი ინტერვიუში კიდევ ერთხელ აღნიშავს, რომ დამოუკიდებელი მინისტრია, რომელიც არც ერთ პოლიტიკურ სტრუქტურას არ წარმოადგენს.

„თუ თქვენ პუტინთან ახლო ურთიერთობების დემონსტრირებას ახდენთ, როგორ შეგიძლიათ იმავდროულად მოსკოვისადმი ევროკავშირის კრიტიკული დამოკიდებულება დამაჯერებლად წარმოადგინოთ?“, - დაინტერესდა ჟურნალისტი.

„ევროპული სანქციები რუსეთისადმი - ეს სახელისუფლებო გადაწყვეტილებაა. ჩვენ 27 ქვეყანასთან ტანდემში ვართ. ყირიმის საკითხს მე საერთაშორისო ნორმების თვალსაზრისით განვიხილავ და პუტინთან ვალსი აქ ვერაფერს შეცვლის“, - განაცხადა ავსტრიის საგარეო საქმეთა მინისტრმა.

კარინ კნაისლის ქორწილი 18 აგვისტოს გაიმართა, სადაც მინისტრმა პუტინთან ერთად იცეკვა, რასაც დიდი გამოხმაურება მოჰყვა.