სენცოვის მხარდასაჭერად აქტივისტებმა პარიზში უვადო შიმშილობა დაიწყეს

პარიზში უკრაინელი რეჟისორის, ოლეგ სენცოვის მხარდასაჭერად აქტივისტებმა უვადო შიმშილობა დაიწყეს. ისინი რუსეთის საელჩოს წინ არიან. ინფორმაციას ფრანგული მედია ავრცელებს.

აქციის მონაწილეები სხვადასხვა ცნობილი ადამიანები არიან, მათ შორის ფრანგი პოლიტიკოსები, კულტურის სფეროს წარმომადგენლები და ასე შემდეგ. ისინი ყოველ 24 საათში ერთხელ, დილის 9:00 საათზე ჩაენაცვლებიან ერთმანეთს და იშიმშილებენ. აქციის ორგანიზატორი საფრანგეთის იუსტიციის ყოფილი მინისტრი კრისტიან ტობირია.

Devant l’ambassade de Russie, une chaîne de grève de la faim s’est lancée pour soutenir Oleg Sentsov.
Je prends le relais du réalisateur Emmanuel Finkiel.
Cette chaîne continuera jusqu’à la libération de Sentsov et des 70 otages politiques ukrainiens de Poutine.#FreeSentsov pic.twitter.com/LAlX66N9Oy

— Raphael Glucksmann (@rglucks1) September 16, 2018

ოლეგ სენცოვი 124-ე დღეა უკვე რუსეთის ციხეში შიმშილობს, ამის გამო მისი ჯანმრთელობის მდგომარეობა გაუარესდა. რეჟისორის დამ ნატალია კაპლანმა წერილი გამოაქვეყნა, რომელიც სენცოვმა ციხეში დაწერა.

14 აგვისტოს რუსეთის პრეზიდენტის ადმინისტრაციამ უარი უთხრა უკრაინელი რეჟისორის, ოლეგ სენცოვის დედას, რომელმაც პრეზიდენტ პუტინს შვილის შეწყალების თხოვნით მიმართა.

სენცოვის დედამ ვლადიმერ პუტინს შვილის შეწყალების თხოვნით 13 ივლისს მიმართა.  რეჟისორი ტერორიზმშია დადანაშაულებული და მას 20 წლით თავისუფლების აღკვეთა აქვს მისჯილი. ის სასჯელს კოლონიაში „თეთრი დათვი“ იხდის.

ოლეგ სენცოვის გათავისუფლების მოთხოვნით აქციები რამდენჯერმე გაიმართა მოსკოვსა და ევროპის ქალაქებში. გარდა ამისა, აშშ-ის პენცენტრმა და აშშ-ის საგარეო უწყებამ რუსეთის პრეზიდენტ ვლადიმერ პუტინს სენცოვის გათავისუფლება სთხოვეს. 

ოლეგ სენცოვი ბრალს არ აღიარებს, მან შიმშილობა 16 მაისს გამოაცხადა. 

რუსეთის სპეცსამსახურების თანამშრომლებმა უკრაინელი რეჟისორი ოლეგ სენცოვი 2014 წლის მაისში დააკავეს ანექსირებულ ყირიმში და ბრალად დასდეს ტერაქტების ორგანიზება. 2015 წლის აგვისტოში, დონის როსტოვის სასამართლომ სენცოვს 20 წლით პატიმრობა მიუსაჯა. უკრაინელი რეჟისორი პოლიტპატიმრად აღიარა უფლებადამცველმა ორგანიზაცია „მემორიალმა.“