უზენაესის მოსამართლედ კავანოს დანიშვნაზე კენჭისყრა FBI-ის გამოძიების გამო გადაიდო

აშშ-ის სენატმა აშშ-ის უზენაესი სასამართლოს მოსამართლედ ბრეტ კავანოს დანიშვნაზე კენჭისყრა ზუსტად 1 კვირით, 5 ოქტომბრამდე გადადო. ამ დროის განმავლობაში გამოძიების ფედერალურმა ბიურომ (FBI) უნდა მოასწროს და გამოიძიოს კავანოს წინააღმდეგ არსებული ბრალდებები, რომლებიც სექსუალურ ძალადობას შეეხება. ასეთი ბრძანება ქვეყნის პრეზიდენტმა დონალდ ტრამპმა გასცა. ინფორმაციას BBC ავრცელებს.

თეთრი სახლის პრესსპიკერმა სარა სანდერსმა ტრამპის სახელით განცხადება Twitter-ზე გამოაქვეყნა:

"FBI-ს მითითება მივეცი, რომ დამატებითი გამოძიება ჩაატაროს და მოსამართლე კავანოს შესახებ ინფორმაცია განაახლოს. სენატის თხოვნით, ინფორმაციის განახლების პროცესი არა უმეტეს 1 კვირაში უნდა დასრულდეს", - წერია ტრამპის განცხადებში. 

Statement from President @realDonaldTrump:
“I’ve ordered the FBI to conduct a supplemental investigation to update Judge Kavanaugh’s file. As the Senate has requested, this update must be limited in scope and completed in less than one week.”

— Sarah Sanders (@PressSec) September 28, 2018

დონალდ ტრამპმა არაერთხელ განაცხადა, რომ ბრეტ კავანოს სრულად ენდობა და მის უდანაშაულობაში დარწმუნებულია. 

28 სექტემბერს შეერთებული შტატების სენატის სასამართლო კომიტეტმა ბრეტ კავანოს უზენაესი მოსამართლის პოსტზე მხარი დაუჭირა. კომიტეტის დემოკრატმა წევრებმა მის წინააღმდეგ მისცეს ხმა.

კავანოს სექსუალურ ძალადობაში 3 ქალი ადანაშაულებს, ის კი ბრალდებებს უარყოფს.

10 ივლისს აშშ-ის პრეზიდენტმა ქვეყნის უზენაესი სასამართლოს მოსამართლის თანამდებობაზე ბრეტ კავანოს კანდიდატურა დაასახელა. 81 წლის მოსამართლე ენტონი კენედი 31 ივლისს გადადგა. 

აშშ-ში უზენაესი სასამართლოს შემადგენლობის მნიშვნელობაზე ვრცლად ინფორმაცია იხილეთ ამ ბმულზე.