სკრიპალების მოწამვლაში ეჭვმიტანილი სავარაუდოდ უკრაინიდან იანუკოვიჩის ევაკუაციაშიც მონაწილეობდა

სკრიპალების მოწამვლაში ეჭვმიტანილი, სავარაუდოდ, უკრაინიდან ვიქტორ იანუკოვიჩის ევაკუაციაშიც მონაწილეობდა. ეს ინფორმაცია კომპანია „იუკოსის“ ყოფილი მფლობელის, მიხაილ ხოდორკოვსკის მიერ შექმნილი ცენტრის „დოსიეს“ მიერ გამოქვეყნებულ მონაცემებში წერია. ამის შესახებ "რადიო თავისუფლება" წერს.

ახალი მონაცემები რუსეთის სამხედრო დაზვერვის პოლკოვნიკის, ანატოლი ჩეპიგას  შეეხება, რომელზეც საგამოძიებო ჯგუფი Bellingcat-ი ამბობს, რომ სწორედ ანატოლი ჩეპიგაა ვინმე რუსლან ბოშიროვი, რომელიც დიდი ბრიტანეთის ქალაქ სოლსბერიში რუსეთის სამხედრო დაზვერვის ყოფილი ოფიცრის, სერგეი სკრიპალის და მისი ქალიშვილის, იულიას მოწამვლაშია ეჭვმიტანილი.

„დოსიეს“ მონაცემებით, რუსეთის სამხედრო დაზვერვის სპეცრაზმის მე-14 ბრიგადის მაიორი ჩეპიგა 2009 წელს გადაიყვანეს სამხედრო-დიპლომატიურ აკადემიაში. გამოძიების თანახმად, 2010 წელს ჩეპიგამ დუშანბეს მკვიდრის, რუსლან ბოშიროვის სახელზე გაცემული პასპორტი მიიღო.

„დოსიეს“ მონაცემებში წერია, რომ 2014 წლის თებერვალში, ანატოლი ჩეპიგა უკრაინიდან ქვეყნის პრეზიდენტ ვიქტორ იანუკოვიჩის ევაკუაციაში მონაწილეობდა. სპეცოპერაცია რუსეთის თავდაცვის სამინისტროს სპეციალური ოპერაციების ძალებმა ჩაატარეს. სპეცოპერაციაში მონაწიელობისთვის კი, "დოსიეს" ინფორმაციით, ჩეპიგას რუსეთის გმირის წოდება აქვს მიღებული.

„დოსიეს“ პუბლიკაცია მოიცავს დოკუმენტების ფოტოასლებს და ინფორმაციას რუსეთის სამხედრო დაზვერვის სხვა სავარაუდო თანამშრომლების შესახებაც, რომლებიც მოსკოვში ერთსა და იმავე მისამართზე არიან რეგისტრირებულნი. ამ პუბლიკაციის ავტორმა, ჟურნალისტმა სერგეი კანევმა რუსეთი 30 სექტემბერს,  ხელისუფლებისგან მოსალოდნელი დევნის გამო დატოვა.

კიდევ ერთი რუსული გამოცემა „ნოვაია გაზეტა“ ჩეპიგას ყოფილ თანამებრძოლზე დაყრდნობით წერს, რომ ჩეპიგამ რუსეთის გმირის წოდება ყირიმის ანექსიის ოპერაციაში მონაწილეობისთვის მიიღო.

5 სექტემბერს დიდი ბრიტანეთის პროკურატურამ და სკოტლენდ იარდმა სერგეი სკრიპალისა და მისი შვილის მოწამვლაში ეჭვმიტანილების ვინაობა დაასახელა. ესენი არიან რუსლან ბოშიროვი და ალექსანდრ პეტროვი. დიდი ბრიტანეთის პრემიერმა განაცხადა, რომ ისინი რუსეთის სამხედრო დაზვერვაში მუშაობენ. ასევე  სკრიპალების მოწამვლაში ეჭვმიტანილი მესამე პირის ვინაობა დაადგინეს. მოგვიანებით ბოშიროვის შესახებ დეტალები გახდა ცნობილი. გამოძიების თანახმად, მას ანატოლი ჩეპიგა ჰქვია.

კრემლში კი აცხადებენ, რომ სკრიპალების მოწამვლაში ეჭვმიტანილზე არაფერი იციან.

რუსეთის დაზვერვის ყოფილი თანამშრომელი სერგეი სკრიპალი და მისი ქალიშვილი იულია დიდ ბრიტანეთში, სოლსბერიში ნერვული აგენტი "ნოვიჩოკით" მოწამლეს. სკრიპალები სიკვდილს გადაურჩნენ, თუმცა, ექიმების მეთვალყურეობის ქვეშ რჩებიან. სკრიპალების მოწამვლას თანამედროვე პოლიტიკის ისტორიაში ყველაზე დიდი დიპლომატიური დაპირისპირება მოჰყვა.