კვლევა: ევროპის პარლამენტებში ქალებს სექსუალურად ავიწროებენ

ქალების შევიწროების, ძალადობისა და სექსიზმის შემთხვევებმა ბოლო ბოლო დროს იმატა. საპარლამენტთაშორისო კავშირისა (IPU) და ევროპის საბჭოს საპარლამენტო ასამბლეის მიერ ჩატარებული ახალი კვლევის შესახებ CNN-ი წერს. 

კვლევა 123 ქალის ინტერვიუს ეყრდნობა. მათ შორის იყო 81 დეპუტატი და პარლამენტის 42 თანამშრომელი (ევროპის 45 ქვეყნიდან). 
ქალების 47%-მა თქვა, რომ დამუქრებიან მოკვლით, გაუპატიურებით ან ცემით; 68%-მა თქვა, რომ მათ მიმართ გამოუთქვამთ სექსისტური კომენტარები; 25%-ის თქმით კი, მათზე სექსუალურად უძალადიათ. 

დეპუტატების 85%-ზე პარლამენტში კაც თანამშრომლებს ფსიქოლოგიურადაც უძალადიათ, თუმცა სხვა თანამშრომლებთან შედარებით, დეპუტატები უფრო იშვიათად გამხდარან სქესის გამო შევიწროების მსხვერპლნი. 

კვლევამ აჩვენა ისიც, რომ ქალების მხოლოდ მცირე ნაწილი საუბრობს იმაზე, რომ ის ძალადობის მსხვერპლი გახდა. დეპუტატთა მხოლოდ 23.5% და პარლამენტის თანამშრომელთა 6% ამბობს, რომ სექსუალური შევიწროების შემდეგ შესაბამისი უწყებებისთვის მიუმართავთ. 

პოლიტიკოსებამდე, სექსუალურ შევიწროებაზე საუბარი აქტიურად დაიწყეს ხელოვნების სხვადასხვა სფეროში მომუშავე ქალებმა. 2017 წელს ჰოლივუდში სექს-სკანდალი აგორდა, რომლის მთავარი გმირი პროდიუსერი ჰარვი ვაინშტეინი იყო. სკანდალური საქმის შესახებ მასალები თითქმის ერთდროულად გამოაქვეყნა ორმა წამყვანმა ამერიკულმა გამოცემამ - The New York Times-მა და The New Yorker-მა.

მალევე დაიწყო კამპანია #MeToo, რომლის ერთ-ერთი ლიდერიც აზია არჯენტო კინოს ბიზნესში ერთ-ერთი პირველი იყო, ვინც პროდიუსერი ჰარვი ვაინშტეინი სექსუალურ ძალადობაში დაადანაშაულა. 2017 წელს, კანის 71-ე კინოფესტივალზე სიტყვით გამოსვლისას მან თქვა, რომ 1997 წელს ვაინშტეინმა გააუპატიურა. არჯენტო მოძრაობა #MeToo-ს ერთ-ერთი ლიდერი გახდა. თუმცა ახლახანს გაირკვა, რომ თავად არჯენტომ წარსულში 17 წლის ბიჭზე, მსახიობ ჯიმი ბენეტზე სექსუალურად იძალადა. ამის შესახებ ინფორმაცია ამერიკულმა The New York Times-მა გამოაქვეყნა. გამოცემის ცნობით, მათ არჯენტოს „ბრალის“ დამადასტურებელი დოკუმენტები მოიპოვეს, მათ შორის ფოტოც, რომელთა ავთენტურობაც საქმესთან დაკავშირებულმა სამმა ადამიანმა დაადასტურა.

მსახიობმა ბრალდება უარყო, რის შემდეგაც მას ფოტოს სახით კომპრომატი გამოუქვეყნეს.