რუსეთმა იდლიბის პროვინციაში ტერორისტების ლიკვიდაციის უფლება დაიტოვა

რუსეთი იტოვებს უფლებას, დაეხმაროს სირიის მთავრობას იდლიბის პროვინციაში ტერორისტების ლიკვიდაციაში, თუ „ისლამური სახელმწიფო“ გააგრძელებს პროვოკაციას, - ამის შესახებ რუსეთის პრეზიდენტმა ვლადიმერ პუტინმა სტამბოლის სამიტის შემდეგ განაცხადა. 

პუტინის თქმით, მიუხედავად იმისა, რომ სირიაში ძალადობის დონემ იკლო, მნიშვნელოვანია იმ ელემენტების ლიკვიდირება, რომლებიც იწვევენ პროვოკაციას. მოსკოვი იმედოვნებს, რომ თურქეთი რაც შეიძლება მალე იდლიბის დემილიტარიზებული ზონიდან გაიყვანს ოპოზიციურ ძალებს.

სტამბოლში შეხვედრის შედეგებზე საუბრისას, ქვეყნის ლიდერებმა თქვეს, რომ შეთანხმდნენ „ჰუმანიტარული დახმარების“ კონცეფციის გაფართოებაზე, რაც გულისხმობს სამედიცინო აღჭურვილობის გადაცემას, წამლების, ინფრასტრუქტურის და წყალმომარაგების აღდგენას.

რუსეთის აზრით, ჟენევაში მნიშვნელოვანია ამოქმედდეს საკონსტიტუციო კომიტეტი. პუტინის ამბობს, რომ ამ ორგანომ უნდა განიხილოს სირიის მომავალი სახელმწიფოს საკითხები. კომიტეტი უნდა აღიარონ სირიაში ყველა ლეგიტიმურმა მხარემ. 

თავის მხრივ თურქეთის პრეზიდენტმა რეჯეფ თაიფ ერდოღანმა განაცხადა, რომ ევროკავშირმა უნდა შეასრულოს თავისი ფინანსური ვალდებულებები სირიელი ლტოლვილების დასახმარებლად. „ჩვენს მიერ დახარჯული 33 მილიარდი დოლარი სირიელი ლტოლვილებისთვის მოწმობს ჩვენს მიზანმიმართულობას მათი დახმარების საკითხში. თურქეთში სამი მილიონი ლტოლვილი ცხოვრობს“, - განაცხადა ერდოღანმა სამიტის შემდეგ.

რაც შეეხება დასავლეთ ევროპის ლიდერებს ემანუელ მაკრონმა და ანგელა მერკელმა განაცხადეს, რომ სამხედრო ოპერაციები იდლიბში დაუშვებელია და უმჯობესი იქნება დემილიტარიზებულ ზონად აღიარებულ ტერიტორიაზე სამხედრო ოპერაციების არ განხორციელდეს, რათა სიტუაციის დეესკალაცია არ მოხდეს.

მასშტაბური საპროტესტო გამოსვლების შემდეგ სირიაში სამოქალაქო ომი 2011 წლის 15 მარტს დაიწყო. მოგვიანებით კი, ომში რეგიონული და გლობალური ძალები ჩაერთვნენ.