ტრამპმა მერკელს ნატო-სთვის გადასახდელი 374 მილიარდი დოლარის ინვოისი უჩვენა

Independent-ის ცნობით, ვაშინგტონში გერმანიის კანცლერის ვიზიტისას, დონალდ ტრამპმა ანგელა მერკელს გერმანიის მიერ ნატო-ს თავდაცვის მომსახურებისთვის 375 მილიარდ დოლარამდე გადაუხდელი თანხის ინვოისი უჩვენა. 

გამოცემის თანახმად, ტრამპისა და მერკელის დახურულ შეხვედრაზე, სწორედ აღნიშნული თანხა იყო მსჯელობის ერთ-ერთი საგანი. Independent-ის წყაროს ცნობით, ტრამპის საქციელმა გერმანიისა და ნატო-ს წარმომადგენლების კრიტიკა გამოიწვია.

გამოცემა The Time-ის სტატიას ციტირებს, სადაც გერმანიის ერთ-ერთი მინისტრი, რომელსაც ვინაობის გამხელა არ სურს, ტრამპის "ინვოისს" შეურაცხმყოფელს უწოდებს და დასძენს, რომ "ასეთ ქმედებებს მხარეები ერთმანეთის დასაშინებლად იყენებენ, თუმცა კანცლერი პროვოკაციას არ წამოეგო და ფაქტს მშვიდად შეხვდა."

აღსანიშნავია, რომ ტრამპსა და მერკელის შეხვედრიდან მეორე დღეს, აშშ-ის პრეზიდენტმა Twitter-ზე დაწერილ პოსტში შეხვედრა დადებითად შეაფასა. 

გერმანიის თავდაცვის მინისტრმა ურსულა ვან დერ ლეიენმა გავრცელებულ ინფორმაციაზე განცხადება გააკეთა. მისი თქმით, "ევროკავშირს ნატო-ს ვალი არ აქვს."

დონალდ ტრამპი და ანგელა მერკელი ერთმანეთს 17 მარტს შეხვდნენ. ბრიფინგზე ითქვა, რომ ტრამპმა ნატო-ს წევრებისაგან ერთობლივი თავდაცვისათვის ბიუჯეტების გაზრდა მოითხოვა და ამ მოთხოვნას სამართლიანი უწოდა. თავის მხრივ, მერკელმა აღნიშნა, რომ გერმანია განაგრძობს თავდაცვის ბიუჯეტის ზრდას მშპ–ის 2%–მდე. ასეთ ნიშნულს ალიანსის წევრებმა ნატოს 2024 წლის სამიტისთვის უნდა მიაღწიონ.

ბოლო მონაცემებით, ნატოს წევრი მხოლოდ 5 სახელმწიფო ხარჯავს თავდაცვაზე მშპ–ის 2%–ს. გერმანიის ხარჯები მშპ–ის 1,2%–ს შეადგენს, აშშ ამ მიმართულებით კი 3,6%–ს ხარჯავს.

წინასაარჩევნო კამპანიის ფარგლებში ტრამპი მკაცრად აკრიტიკებდა ალიანსსა და მასში შემავალი ქვეყნების თავდაცვითი ხარჯების სიმცირეს.