მედიამ მოკლული საუდელი ჟურნალისტის ბოლო წუთები აღწერა

თურქულმა გამოცემა Haberturk-მა იმ აუდიოჩანაწერების შინაარსი გამოაქვეყნა, რომელიც სტამბოლში საუდის არაბეთის საკონსულოში, საუდელი ჟურნალისტის, ჯამალ ჰაშაღის მკვლელობის დღეს არის გაკეთებული. 

Haberturk-ი ირწმუნება, რომ ეს ინფორმაცია თურქეთის ხელისუფლებასთან დაახლოებული წყაროსგან მიიღო. გამოცემას თავად აუდიოჩანაწერი არ გამოუქვეყნებია.

ჰაშაღი საკონსულოში 2 ოქტომბერს, ადგილობრივი დროით 13:14 საათზე შევიდა. Haberturk-ი წერს, რომ საკონსულოში შესვლისას ჟურნალისტი ოთხი საუდელი აგენტის გარემოცვაში აღმოჩნდა. ერთ-ერთმა მათგანმა მას ხელი ჩაავლო, რაზეც ჟურნალისტმა უყვირა: "გამიშვით, რას აკეთებთ?!" მასსა და აგენტს შორის შეხლა-შემოხლა დაიწყო. ჩხუბი თავდაპირველად საკონსულოს სავიზო დეპარტამენტში დაიწყო, შემდეგ კი ადმინისტრაციულ ზონაში გაგრძელდა. ბოლოს კი ჟურნალისტის ცემა და წამება დაიწყეს.

გამოცემის ცნობით, აუდიოჩანაწერში ჰაშაღისა და ოთხი აგენტის გარდა, კიდევ სამი კაცის ხმა ისმის. მათგან ჯერ მხოლოდ ორია იდენტიფიცირებული. ერთ-ერთი ხმა თურქეთში საუდის არაბეთის კონსულს მუჰამედ ალ-უტეიბს ეკუთვნის, მეორე - საუდის არაბეთის დაზვერვის პოლკოვნიკს მაჰერ მუტრებს, რომელიც პრინც მუჰამედ ბინ სალმანთან დაახლოებულ პირად ითვლება. 

Haberturk-ი ირწმუნება, რომ მუტრები ჰაშაღის საკონსულოს ადმინისტრაციულ ზონაში შეხვდა და უთხრა: "გამყიდველო! შენ ამისთვის პასუხს აგებ!". საკონსულოში ჟურნალისტის მისვლიდან 13 წუთის შემდეგ მუტრები კონსულის ოფისისკენ წავიდა და საუდის არაბეთში დაიწყო რეკვა. მან 19 ზარი განახორციელა, მათ შორის საუდის არაბეთის პრინცის მრჩეველთან ალ-კაჰტანთან. როგორც ირკვევა, მუტრებმა მას ოპერაციის მიმდინარეობაზე მიაწოდა ინფორმაცია. 

ჰაშაღის წამების, ცემისა და შეხლა-შემოხლის ხმები საკონსულოში გაკეთებულ ორ აუდიოჩანაწერზეა დაფიქსირებული, რომელიც ჯამში 11 წუთის ხანგრძლივობის არის. ამის შემდეგ საკონსულოს სავიზო და ადმინისტრაციულ ზონებში ორი საათი სიჩუმე იყო. თურქი სამართალდაცავი ორგანოები ვარაუდობენ, რომ საუდელებმა ამ დროის განმავლობაში სიგნალის დამხშობი სპეციალური მოწყობილობები გამოიყენეს. ამის შემდეგ, როგორც Haberturk-ი წერს, სამი აგენტი კიბეებზე ჩამოვიდა და ერთ-ერთმა მათგანმა სათვალთვალო კამერების ჩანაწერები წაშალა. 

აუდიოჩანაწერზე ასევე მოხვდა კაცის ხმა, ის ამბობს, რომ მას ეშინია იმ კაცის ტანსაცმლის ჩაცმა, "რომელიც ჩვენ 20 წუთის წინ მოვკალით". თურქული სპეცსამსახურები ვარაუდობენ, რომ ეს ხმა ინჟინერ მუსტაფა ალ-მუდაინის ეკუთვნის. მან გადაიცვა ჰაშაღის ტანსაცმელი და საკონსულო უკანა კარიდან დატოვა. თურქი სამართალდამცველების თქმით, ეს ფაქტი გახდა ერთ-ერთი მტკიცებულება იმის, რომ საკონსულოდან გამოსული კაცი ჰაშაღი არ ყოფილა, წერს Haberturk-ი. 

გამოცემა აღნიშნავს, რომ თურქ სამართალდამცველებს საკონსულოს ადმინისტრაციულ ნაწილში გაკეთებული აუდიოჩანაწერი, სადაც ჟურნალისტი  მოკლეს, არ აქვთ. ისინი მივიდნენ ვარაუდამდე, რომ ჟურნალისტის სხეული დაანაწევრეს. ამის ვარაუდის საფუძველს კი ის იძლევა, რომ შენობის ამ ნაწილში კედლები ცოტა ხნის წინ გადაიღება, ოთახებში კი ქიმიური ნივთიერებებისა და სავარაუდო მკვლელების თითის ანაბეჭდები იპოვეს.

საუდის არაბეთი მსოფლიოს წამყვანი ქვეყნების კრიტიკის ქარცეცხლშია. მიზეზი 2018 წლის 2 ოქტომბერს სტამბოლში, საუდის არაბეთის საკონსულოდან The Washington Post-ის ჟურნალისტ ჯამალ ჰაშაღის გაუჩინარებაა. 

აშშ-ის ცენტრალური სადაზვერვო სააგენტოს (CIA) ინფორმაციით, საუდელი ჟურნალისტის მკვლელობაში დამნაშავე საუდის არაბეთის პრინცი მუჰამედ ბინ სალმანია. ამერიკული პრესა წერს, რომ თავად პრინცმა შეუკვეთა მკვლელობა.

რამდენიმე კვირის წინ თურქეთის პროკურატურამ ოფიციალურად განაცხადა, რომ მოკლული ჟურნალისტის  ცხედარი დაანაწევრეს. აქამდე მისი გაუჩინარების შესახებ ასეთი ვერსია ვრცელდებოდა - ცხედარი მჟავის საშუალებით გაანადგურეს. ამის შემდეგ თურქეთის პოლიციამ საუდელი ჟურნალისტის ცხედრის ძებნა შეწყვიტა, მაგრამ განაცხადა, რომ საგამოძიებო მოქმედებებს განაგრძობს. 

საუდის არაბეთმა ჰაშაღის მკვლელობის საქმეზე 21 ეჭვმიტანილი დააკავა. ბრალი ოფიციალურად 11-ს წაუყენეს.