ტრამპის სიძე სენატორების კითხვებს უპასუხებს

აშშ-ის პრეზიდენტის დონალდ ტრამპის სიძემ ჯარედ კუშნერმა გადაწყვიტა, სენატის საგამოძიებო კომიტეტის წევრების იმ კითხვებს უპასუხოს, რომელიც მისი რუსეთთან შესაძლო კავშირებს ეხება. ამის შესახებ CNN-ი თეთრი სახლის პრესმდივანზე შინ სპაისერზე დაყრდნობით იუწყება. „წინასაარჩევნო კამპანიისა და გარდამავალი პერიოდის დროს კუშნერს აქტიური კავშირები ჰქონდა სხვადასხვა ქვეყნების მთავრობებთან და თანამდებობის პირებთან. ამ ფაქტის გათვალისწინებით, მან ნებაყოფლობით გადაწყვიტა, სენატის საგამოძიებო კომიტეტის წევრებს გაესაუბროს, თუმცა ჯერჯერობით შეხვედრის დანიშვნაზე შეწყობინება არ მიუღია,“-განაცხადა სპაისერმა.

სენატის კომიტეტში კი აღნიშნეს, რომ კუშნერი დათანხმდა ამერიკის საპრეზიდენტო არჩევნებში რუსეთის ჩარევის შესახებ ისაუბროს. „ჩვენ ვიმედოვნებთ, რომ ის საკვანძო შეკითხვებზე უპასუხებს,“- ნათქვამია კომიტეტის თავმჯდომარის განცხადებაში. მანამდე გავრცელდა ინფორმაცია, რომ სენატორები კუშნერს გამოკითხავენ რუსეთის ელჩთან სერგეი კისლიაკთან და რუსეთის საგარეო ეკონომიკური ბანკის ხელმძღვანელ სერგეი გორკოვთან შეხვედრების შესახებ. გორკოვი 2014 წელს ამერიკის სანქციების სიაში იყო შეყვანილი.

20 მარტს ამერიკის გამოძიების ფედერალური ბიურის ხელმძღვანელმა ჯეიმს კომიმ განაცხადა, რომ სპეცსამსახურები გამოიძიებენ ინფორმაციას ტრამპის მოსკოვთან კავშირებისა და ამერიკის არჩევნებში რუსეთის შესაძლო ჩარევის შესახებ. 

ტრამპის გუნდისა და რუსეთის სპეცსამსახურების შესაძლო კავშირის შესახებ ინფორმაცია პირველად ამერიკულმა მედიამ გაავრცელა. ამის გამო პრეზიდენტმა ტრამპმა ისინი მკაცრად გააკრიტიკა და დაზვერვის სამსახური მედიისთვის ინფორმაციის მიწოდებაშიც დაადანაშაულა. შესაბამისი პოსტი მან Twitter-ზე გამოაქვეყნა. 

2017 წლის დასაწყისში CNN-ი და The Washington Post-ი იუწყებოდნენ, რომ ვიდრე ჯეფ სეშნს აშშ-ის გენერალურ პროკურორად და იუსტიციის მინისტრად დანიშნავდნენ, მას ურთიერთობა ჰქონდა ამერიკაში რუსეთის ელჩ სერგეი კისლიაკთან. თებერვლის დასწყისში ცნობილი გახდა რუს დიპლომატთან პრეზიდენტის მრჩევლის მაიკლ ფლინის სატელეფონო საუბრების შესახებ. საბოლოოდ, ფლინი გადადგა.
ტრამპის გუნდს მოსკოვთან არაფორმალურ კავშირებში ადანაშაულებენ. თავად ტრამპი რუსეთთან რაიმე ტიპის პოლიტიკურ ან საქმიან კავშირებს უარყოფს.   

დონალდ ტრამპმა გაპრეზიდენტებისთანავე თავისი სიძე, ჯარედ კუშნერი ერთ-ერთ მთავარ მრჩევლად დანიშნა. 35 კუშნერი ივანკა ტრამპის ქმარია და საპრეზიდენტო კამპანიაში წამყვან როლს თამაშობდა.   ჯარედ კუშნერი უძრავი ქონების სფეროში მსხვილი ინვესტორია და აქვს ფართო ბიზნესინტერესები.