ოთარ დანელია მიწის მართვის სააგენტოს შექმნას ითხოვს

აგრარულ საკითხთა კომიტეტის სხდომაზე „სასოფლო-სამეურნეო დანიშნულების მიწის საკუთრების შესახებ“ საქართველოს ორგანული კანონის პროექტის ინიციატივით გამოდის. ის სხდომაზე კომიტეტის თავმჯდომარემ ოთარ დანელიამ წარადგინა.

ორგანული კანონპროექტი ეფუძნება შემდეგ ძირითად პრინციპებს:

საკუთრების უფლების დადგენა სასოფლო-სამეურნეო დანიშნულების მიწაზე საჯარო და კერძო ინტერესების დაცვით; მიწის მდგრადი მართვის სახელმწიფო პოლიტიკის ხელშეწყობა; ეროვნული უსაფრთხოების პოლიტიკის დაცვა; ადგილობრივი მეურნეობის განვითარება.

ოთარ დანელიამ ისაუბრა იმ საკითხებზე, რომლებსაც წარმოდგენილი კანონპროექტები აგვარებს, მათ შორის, ეროვნული და სურსათის უსაფრთხოების საკითხები, ლიკვიდური აქტივის საკითხი, მიწის მაქსიმალურად რაციონალურად გამოყენების საკითხი და სხვა.

კანონით შემოდის საჯარიმო სანქციები მიწის არდამუშავების შემთხვევაში და ეს, ოთარ დანელიას განცხადებით, არის აუცილებელი პირობა იმისათვის, რომ შეიქმნას უფრო მეტი სტიმული მიწის დამუშავებისთვის.

მისივე თქმით, კომიტეტი გამოდის ინიციატივით, რომ შეიქმნას მიწის მართვის ეროვნული სააგენტო, რომელიც სასოფლო-სამეურენო დანიშნულების მიწების ბალანსების შედგენიდან დაწყებული, მისი კლასიფიკაციისა თუ სტატუსების ფარგლებში გააკეთებს შესაბამის ანალიზს.

„სამწუხაროდ, არავინ იცის, თუ ზუსტად რამდენია ქვეყანაში სასოფლო-სამეურნეო დანიშნულების მიწა, ხშირად არის სტატუსების ცვლილების პრობლემა და სხვა საკითხები, რომლებიც სააგენტომ უნდა გადაწყვიტოს“, - აცხადებს დანელია.

კომიტეტის თავმჯდომარის აზრით, ორგანული კანონი მიღებისთანავე უნდა შევიდეს ძალაში.