დიპლომატები საქართველოს საპრეზიდენტო არჩევნებს აფასებენ

2018 წლის არჩევნებზე მიღებული გამოცდილება და სამომავლო გეგმებია განხილვის მთავარი თემა სასტუმრო „ბილტმორში“ მიმდინარე კონფერენციაზე. შეხვედრაში მონაწილეობენ ევროსაბჭოს, ევროკავშირის, ამერიკის დიპლომატიური წარმომადგენლები, ასევე, პარლამენტის თავმჯდომარე, ცესკოს ხელმძღვანელი და ოპოზიციური პოლიტიკური ჯგუფები. 

ამერიკის შეერთებული შტატების ელჩის მოვალეობის შემსრულებელმა როს უილსონმა საპრეზიდენტო არჩევნების შეფასების დროს აღნიშნა, რომ საქართველომ ბოლო სამი ათწლეულის განმავლობაში დიდი პროგრესი განიცადა. „სხვადასხვა საერთაშორისო ანგარიშებში ეს იქნება "ოდირის", საერთაშორისო თუ ადგილობრივი ორგანიზაციების ანგარიშები, ასევე, საელჩოს საკუთარ შეფასებაში არის მითითებული გარკვეულ პრობლემებსა და ხარვეზებზეც, რისი გადაჭრაც მნიშვნელოვანია ამ ქვეყნის წარმატებული და დემოკრატიული განვითარებისათვის. მივესალმები პარლამენტარებისa და სხვა სამოქალაქო ჯგუფების ჩართულობას“, - განაცხადა უილსონმა.

შეკითხვაზე, რა არის ფუნდამენტური პრობლემა, ელჩის მოვალეობის შემსრულებელმა აღნიშნა, რომ მრავალი საკითხია ერთმანეთთან დაკავშირებული. „საუკეთესო გზა არის არა ერთი, ორი ან სამი საკითხის, არამედ მათი მთლიანობაში, კომპლექსურად განხილვა. ნაბიჯები, რაც უნდა გადაიდგას დემოკრატიის გასაუმჯობესებლად, ზოგადად, ქვეყნის წარმატებისთვის და არჩევნების უკეთესად ჩასატარებლად, არის კომპლექსური და ნაბიჯ-ნაბიჯ გასაკეთებელი“, - თქვა ამერიკელმა დიპლომატმა.

ევროსაბჭოს ოფისის ხელმძღვანელი, კრისტიან ურსე ამბობს, რომ  საქართველოს დაუგროვდა საკმაოდ კარგი გამოცდილება დემოკრატიული არჩევნების ჩატარების, თუმცა ბოლო არჩევნებმა გამოწვევები აჩვენა.

„მაგალითად ადმინისტრაციული რესურსის ბოროტად გამოყენება, საარჩევნო ადმინისტრაციების არაჯეროვანი დაკომპლექტება, ნეგატიური კამპანია, სიძულვილის ენა. იმედი მაქვს, ჩვენი დისკუსიები შექმნილ ვითარებას გააუმჯობესებს. თუ წინა არჩევნებს შევხედავთ, 2020 წლის არჩევნებამდე დარჩენილია წელიწადნახევარი, რაც მოგვცემს საშუალებას, დავსხდეთ ერთად, განვიხილოთ არსებული შედეგები, არასამთავრობოების, ოპოზიციის და სხვა დაინტერესებული მხარეების ჩართულობით. ამ განხილვების შედეგად მივიდეთ პოლიტიკურ კონსენსუსამდე“, - განაცხადა ევროსაბჭოს წარმომადგენელმა.

ევროკავშირის ელჩის, კარლ ჰარცელის თქმით კი, უნდა დაიწყოს ყველა იმ რეკომენდაციაზე ფიქრი და მსჯელობა, რომელიც მოხსენიებულია ეუთოს ანგარიშში. „ვფიქრობ, ეს ის დროა, როდესაც უნდა დავიწყოთ ყველა იმ რეკომენდაციაზე ფიქრი და მსჯელობა, რომელიც მოხსენიებულია ეუთოს ანგარიშში და ერთობლივად შევიმუშავოთ ის გეგმა, რომელიც აუცილებელია შემდგომი 10-12 თვის განმავლობაში, რადგან ეს სწორედ ის პერიოდია, რაც არის დარჩენილი შემდგომ არჩევნებამდე და ჩვენ ამ რეკომენდაციის შესრულება შეგვეძლება. ამ პერიოდის შემდეგ ჩვენ უკვე არჩევნების წინაშე ვიქნებით, ამიტომ ამ დრომდე მაქსიმალური ძალისხმევა უნდა გავწიოთ. ვფიქრობ, დრო არის ძალიან ცოტა და დღევანდელი შეხვედრა არის ამ პროცესის და ამ რეკომენდაციების გააზრების დასაწყისი. ეს არის ძალიან მნიშვნელოვანი პროცესი საქართველო-ევროკავშირის ურთიერთობისთვის სამომავლოდ და იმედი მაქვს, დღეს ნაყოფიერად დავიწყებთ ამ თემატიკაზე მსჯელობას“, -  განაცხადა ევროკავშირის ელჩმა კარლ ჰარცელმა.

მისივე თქმით, ანგარიშში ნათლადაა მოცემული ყველა რეკომენდაცია, რაც ყველასთვის ცნობილია. "ეს რეკომენდაციები უნდა ავიღოთ როგორც საზომი, მათი შესრულება როგორ ხდება. ვფიქრობ უმთავრესი ელემენტებია საარჩევნო კომისიების დაკომპლექტების წესი, ძალიან მნიშვნელოვანია დაფინანსების თემატიკა და პარტიული და სახელმწიფო რესურსების გამიჯვნა. ეს რეკომენდაციები ჩვენთვის არის სამოქმედო გეგმა, რომელსაც უნდა მივდიოთ 2020 წლის არჩევნებამდე“, - განაცხადა კარლ ჰარცელმა.