კობახიძე: აგრესიული კამპანიის გამო საპრეზიდენტო არჩევნები იყო ყველაზე ცუდი 2012 წლის შემდეგ

„2012 წლის შემდეგ ქვეყანაში არის უზრუნველყოფილი სამართლიანი, თავისუფალი არჩევნების ჩატარება და სწორედ ასეთი არჩევნების საფუძველზე ყალიბდება კონსტიტუციური ორგანოები, - ამის შესახებ საქართველოს პარლამენტის თავმჯდომარე ირაკლი კობახიძემ სასტუმრო „ბილტმორში“ 2018 წლის საპრეზიდენტო არჩევნებზე უცხოელ დიპლომატებთან შეხვედრისას განაცხადა.

მისი თქმით, ამ კუთხით არის ფუნდამენტური წინსვლა. "ჩვენი ამოცანაა მშვიდობიანი არჩვენების ჩატარება. მშვიდობიანში არ იგულისხმება მხოლოდ ფიზიკური ძალადობის არ არსებობა,  აქ იგულისხმება ვერბალური აგრესიისგანაც არჩევნების მაქსიმალური გათავისუფლება. ამ კუთხით გვაქვს გამოწვევები, რაზეც აუცილებელია მსჯელობა“, - თქვა კობახიძემ.

მისივე შეფასებით, საპრეზიდენტო არჩევნები იყო ყველაზე ცუდი არჩევნები 2012 წლის შემდეგ, რადგან იყო უაღრესად აგრესიული კამპანია პირველივე დღიდან. "ამას სხვადასხვა მიზეზი ჰქონდა. მთავარი მიზეზი არის ის, რომ იყო პოლარიზებული გარემო. ასევე, ერთ-ერთი მიზეზი იყო ის, რაზეც ჩვენ ვსაუბრობდით – ჯერ კიდევ საკონსტიტუციო რეფორმების განხორციელების დროს ვფიქრობდით, რომ არასწორი იყო საპარლამენტო სისტემაში პირდაპირი წესით პრეზიდენტის არჩევა იმ პირობებში, როდესაც საპრეზიდენტო კანდიდატებს არ აქვთ საარჩევნო პროგრამები. ბუნებრივია, მთლიანად ორიენტირებული იყო საარჩევნო კამპანია პერსონალურ თავდასხმებზე, აგრესიაზე. აქედან გამომდინარე, მოსალოდნელი იყო ასეთი სახით საარჩევნო კამპანიის წარმართვა და სამწუხაროდ, ეს მოლოდინი გამართლდა“, – განაცხადა  ირაკლი კობახიძემ.

მისივე თქმით, ბევრი რამ არის გასაკეთებელი, რომ ქვეყანაში ეს გარემო შეიცვალოს. „ზოგადად, იყო მნიშვნელოვანი ხარვეზები. ამ ხარვეზებში ბრალი აქვს სხვადასხვა მხარეს, მათ შორის მმართველ პარტიასაც. იყო სხვადასხვა კუთხით პრობლემები, ადმინისტრაციული რესურსის გამოყენების მთელი რიგი ფაქტები, ასევე პრობლემა, რომელიც არის ჩვენი ქვეყნის ერთგვარი ცუდი ტრადიცია - ეს არის აგიტატორების ზედმეტად ჩართულობა საარჩევნო კამპანიაში, მთელი რიგი ხარვეზები, რაშიც ბრალი მიუძღვის სხვადასხვა მხარეს, მათ შორის, მმართველ პარტიასაც. მმართველი პარტიის კრიტიკის პრივილეგიას მე დავუტოვებ ჩვენს ოპონენტებს“, - განაცხადა ირაკლი კობახიძემ.