გივი ბერიკაშვილი მარჯანიშვილის თეატრიდან გამოასვენეს

გივი ბერიკაშვილი მარჯანიშვილის თეატრიდან ოთხის ნახევარზე გამოასვენეს. მარჯანიშვილის თეატრში გივი ბერიკაშვილის ხსოვნას პატივი პოლიტიკოსებმა, კულტურის მოღვაწეებმა და საზოგადოებისთვის ცნობილმა ადამიანებმა მიაგეს. გივი ბერიკაშვილის სამოქალაქო პანაშვიდზე იმყოფებოდა ყოფილი პრემიერი ბიძინა ივანიშვილი. მსახიობის ხსოვნას პატივი მიაგო ასევე პრემიერმინისტრმა გიორგი კვირიკაშვილმა, რომელიც მარჯანიშვილის თეატრში მეუღლესთან ერთად იმყოფებოდა.

„ძალიან გული მტკივა, რომ ასე ადრე, ძალიან მოულოდნელად მოხდა მისი წასვლა ამ ქვეყნიდან. ის ყოველთვის დარჩება ჩვენ გვერდით იმიტომ, რომ მთელი ჩვენი ცხოვრების ძალიან ბევრი სასიხარულო, დადებითი მომენტი არის ასოცირებული ამ ადამიანთან. გული ძალიან მტკივა და ვგლოვობ ყველა იმ ადამიანთან ერთად, რომლებსაც ძალიან დააკლდება გივი ბერიკაშვილი“, - განაცხადა გიორგი კვირიკაშვილმა.

კულტურის მინისტრის, მიხეილ გიორგაძის განცხადებით, გივი ბერიკაშვილის გარდაცვალება ქვეყნისთვის დიდი დანაკლისია. მარჯანიშვილის თეატრში იმყოფებოდა დავით უსუფაშვილიც, ასევე საპარლამენტო უმრავლესობის წევრები.

სამოქალაქო პანაშვილი მარჯანიშვილის თეატრში დღეს, 12 საათიდან მიმდინარეობდა. გივი ბერიკაშვილის ხსოვნას პატივი მიაგო საქართველოს პრეზიდენტმა გიორგი მარგველაშვილმა.

გივი ბერიკაშვილს დღეს საბურთალოზე, ამაღლების ეკლესიის ეზოში დაკრძალავენ.

ქართული კინოსა და თეატრის მსახიობი გივი ბერიკაშვილი 10 აპრილს, 83 წლისა გარდაიცვალა. ის კლინიკა MediClubGeorgia-ში ფილტვების ანთების დიაგნოზით, რამდენიმე დღის წინ გადაიყვანეს და მართვით სუნთქვაზე იმყოფებოდა.