სტოლტენბერგი ნატო-საქართველოს სწავლებას გაეცნო და დაჭრილ ქართველ სამხედროებს შეხვდა

ნატოს გენერალური მდივანი იენს სტოლტენბერგი, პრეზიდენტ სალომე ზურაბიშვილთან შეხვედრის შემდეგ, წვრთნისა და შეფასების ერთობლივ ცენტრში (JTEC) მივიდა, სადაც ნატოს ეგიდით მიმდინარე სწავლებას დაესწრო.

სტოლტენბერგთან და მის დელეგაციასთან ერთად ცენტრში პრემიერი მამუკა ბახტაძეც მივიდა. მათ თავდაცვის მინისტრმა ლევან იზორიამ უმასპინძლა. სტოლტენბერგი ასევე შეხვდა ქართველ დაჭრილ და დაშავებულ სამხედრო მოსამსახურეებს. 

მანამდე იენს სტოლტენბერგი საქართველოს პრეზიდენტს და პრემიერმინისტრს მამუკა ბახტაძეს შეხვდა. 

„ნატო-საქართველოს სწავლება 2019“ ოფიციალურად 17 მარტს გაიხსნა. ეს პირველი ერთობლივი მრავალეროვნული ბრიგადის დონის სამეთაურო-საშტაბო სწავლებაა, რომელსაც საქართველოს თავდაცვის ძალები ხელმძღვანელობს.

სწავლება მიზნად ისახავს საქართველოს, ალიანსის და პარტნიორი ქვეყნების შეიარაღებული ძალების ურთიერთშეთავსების ამაღლებასა და საქართველოს თავდაცვის ძალების მართვისა და კონტროლის შესაძლებლობების გაძლიერებას.

სწავლებისას ასევე გამოიცდება ალიანსის Non Article 5 კრიზისებზე რეაგირების ყოვლისმომცველ მიდგომას. პროცესში აქტიურად იქნებიან ჩართულნი საერთაშორისო და არასამთავრობო ორგანიზაციების წარმომადგენლები, რაც ხელს შეუწყობს სამხედრო-სამოქალაქო თანამშრომლობის გაღრმავებას.

„ნატო-საქართველოს სწავლება 2019” რიგით მეორე ღონისძიებაა, რომელიც ნატო-საქართველოს არსებითი პაკეტის ფარგლებში (SNGP) ტარდება. პაკეტი საქართველოს 2014 წელს უელსში გამართულ ნატოს სამიტზე მიენიჭა.

ნატო-საქართველოს პირველი ერთობლივი სწავლება 2016 წელს ჩატარდა. სწავლებაში 14 ქვეყანა მონაწილეობდა, ხოლო წლევანდელ წვრთნებში 24 ქვეყანა მონაწილეობს: ალბანეთი, ბელგია, ბულგარეთი, ჩეხეთის რესპუბლიკა, გერმანია, დანია, ესტონეთი, საფრანგეთი, საბერძნეთი, გაერთიანებული სამეფო, უნგრეთი, ლატვია, ლიეტუვა, ჰოლანდია, ნორვეგია, პოლონეთი, პორტუგალია, რუმინეთი, სლოვაკეთი, თურქეთი, აშშ, აზერბაიჯანი, საქართველო, შვედეთი.

სწავლებაში ასევე აქტიურად არიან ჩართულები საერთაშორისო ჰუმანიტარული ორგანიზაციები: „წითელი ჯვრის საერთაშორისო კომიტეტი“ (ICRC), გაეროს სამშვიდობო ოპერაციების დეპარტამენტი (DPKO)და გაეროს მსოფლიო ჯანდაცვის ორგანიზაცია (WHO, დამკვირვებელი).