პრემიერმინისტრი: კიბერდანაშაულთან გამკლავება ყველაზე ძლიერ ქვეყნებსაც უჭირთ

„ჩემთვის ძალიან მძიმეა იმის მოსმენა, რომ საქართველოში კიდევ ერთხელ დაფიქსირდა პირადი ცხოვრების ამსახველი ფაქტის გავრცელება ინტერნეტსივრცეში“, - განაცხადა დღეს გამართულ პრესკონფერენციაზე საქართველოს პრემიერმინისტრმა მამუკა ბახტაძემ პირადი ცხოვრების ამსახველი კადრების გავრცელებასთან დაკავშირებით. 

მისი თქმით, საზოგადოებისგან ამ ყველაფერს მოჰყვა ძალიან მაღალი მოქალაქეობრივი შეგნებით გამოწვეული ნაბიჯების გადადგმა - მყისიერად მოხდა სამართალდამცველების ინფორმირება. პრემიერის განმარტებით, შსს-ს ჰყავს უკვე ეჭვმიტანილიც და აქტიურად მუშაობენ, რათა გამოვლინდნენ სხვებიც. 

„ზოგადად, კიბერდანაშაული ძალიან კომპლექსური ტიპის დანაშაულია. ეს 21-ე საუკუნეში გამოწვევაა ყველაზე ძლიერი ქვეყნებისთვისაც კი. აქედან გამომდინარე, ერთის მხრივ, ძალიან მძიმეა იმ ყველაფრის მოსმენა, რომ კიდევ ჰქონდა ასეთ ფაქტს ადგილი საქართველოში. ჩვენ კარგად გვესმის, რომ ამ მიმართულებით საჭიროა დამატებითი რესურსები, დამატებითი ინფრასტრუქტურა, ვინაიდან კიბერდანაშაული თავისი შინაარსით არის ძალიან რთული ტიპის დანაშაული. მასთან ბრძოლა ძალიან რთულია. ყველაზე განვითარებულ ქვეყნებსაც კი უჭირთ ეს. აქედან გამომდინარე, ჩემი შეფასებაა, რომ ეს არის ძალიან მძიმე დანაშაული. ვისურვებდი, საქართველოში არასდროს აღარ დაფიქსირდეს მსგავსი ფაქტი“, - განაცხადა ბახტაძემ.

28 მარტს, პირადი ცხოვრების ამსახველი ფარული ვიდეოჩანაწერების საქმეზე ოთხივე დაკავებული გირაოს სანაცვლოდ სასამართლო დარბაზიდან გაანთავისუფლეს. 

როგორ ებრძვის შსს ფარული ვიდეოჩანაწერების გავრცელებას და რატომ ისჯება მათი შენახვა, შეგიძლიათ ამ ბმულზე წაიკითხოთ.