კონსტანტინე გამსახურდია ზვიად გამსახურდიას საქმეზე ბიძინა ივანიშვილის პოზიციას მიესალმება

პარტია „ქართული ოცნების“ თავმჯდომარის ბიძინა ივანიშვილის განცხადებას ზვიად გამსახურდიას დაღუპვის საქმის გამოძიებაზე და სოფელ ხიბულაში მის ჩასვლას საქართველოს პირველი პრეზიდენტის შვილი კონსტანტინე გამსახურდია მიესალმება.

"დადებითად ვარ განწყობილი, რომ ასეთი ნაბიჯი გადაიდგა. როდესაც ასეთ ნაბიჯს დიდი პოლიტიკური გავლენის მქონე ადამიანი დგამს, რა თქმა უნდა, ამას თავისი ზეგავლენა აუცილებლად ექნება როგორც საქმეზე, ისე ზოგადად საქართველოს უახლეს ისტორიასთან მიმართებით, იმ ობიექტური, მიუკერძოებელი და სიმართლის შესაბამისი პოზიციის შემუშავებაში, რაც სამწუხაროდ დღემდე ჩვენ არ გაგვაჩნია. ხუთი წლით გაგრძელდა საქმე და მოხარული ვარ, რომ ამ გაგრძელებას მხარი დაუჭირა როგორც სახელისუფლებო გუნდმა, ისე ოპოზიციამ და ძლივს გაჩნდა პლატფორმა, სადაც მნიშვნელოვანი პოლიტიკური აქტორები ერთ პოზიციაზე დადგნენ. ეს მნიშვნელოვანია სახელმწიფოსთვის. მგონია, რომ ზვიად გამსახურდიამ ძალიან ბევრი საქმე გაუკეთა საქართველოს და ის სხვა განზომილებაში მყოფი, როგორც მიცვალებული აგრძელებს მისთვის დახმარებას კონკრეტულ საკითხებშიც კი. ეს შეიძლება სუბიექტური განცდა იყოს, მაგრამ მე ასე ვფიქრობ“, - განაცხადა კონსტანტინე გამსახურდიამ.

ზვიად გამსახურდიას გარდაცვალების საქმე ბოლომდე უნდა იყოს მიყვანილი და პასუხი გაეცეს კითხვას - რა მოხდა სინამდვილეში, - აცხადებს ფრაქცია “ქართული ოცნების“ ლიდერი მამუკა მდინარაძე. მისი თქმით, საგამოძიებო ვადები სწორედ ობიექტური რეალობის დასადგენად გაიზარდა.

"როგორც კი ეროვნულობაზე იწყებ საუბარს, ერთ-ერთი პირველი, ვინც გახსენდება, ზვიად გამსახურდიაა. ჩვენ, მისი სახელის და გვარის, მისი პერსონალური ფაქტორის გათვალისწინებით გავზარდეთ საგამოძიებო ვადები, რათა იყოს გაცილებით მეტი შანსი, ერთხელ და სამუდამოდ, ზვიად გამსახურდიას გარდაცვალების საქმეზე დადგეს ობიექტური რეალობა, ბოლომდე იქნას ეს საქმე მიყვანილი და გაეცეს პასუხი კითხვას - რა მოხდა სინამდვილეში. ჩემთვის დღეს ძალიან სასიხარულო იყო ჩვენი პარტიის ხელმძღვანელის, ბიძინა ივანიშვილის მხრიდან განსაკუთრებული დამოკიდებულების გამოხატვა ზვიად გამსახურდიას მიმართ. ეს არის ჩვენი პარტიის ხელმძღვანელის და ჩვენი გუნდის თითოეული წევრის დამოკიდებულება”, - განაცხადა მამუკა მდინარაძემ.

ზვიად ძიძიგური პარტია „ქართული ოცნების“ თავმჯდომარის ბიძინა ივანიშვილის განცხადებას გამოეხმაურა და ყურადღება გაამახვილა ყოფილი პრეზიდენტის გარდაცვალების საქმეზე გაამახვილა. დეპუტატის თქმით, ბიძინა ივანიშვილის განცხადება ადასტურებს, რომ მმართველი პარტია ისეთ განწყობაზეა, რომ ყველაფერი უნდა გაკეთდეს, რათა საქმის გამოძიება მოხდეს.

"1993 წლის ბოლოდან დღემდე ბევრი დროა გასული და ბევრი მტკიცებულება, რაც ასეთი საქმის გამოძიებას სჭირდება, განადგურებულია, მაგრამ ეს არ ნიშნავს, რომ მაქსიმუმი არ უნდა გაკეთდეს. მაქსიმუმი უნდა გაკეთდეს. გამიხარდა, რომ ბიძინა ივანიშვილმა საქართველოს პირველ პრეზიდენტზე ასეთი თბილი სიტყვები თქვა. ყველა ადამიანი, ვისთვისაც მნიშვნელოვანია ჩვენი ქვეყნის სუვერენიტეტი, მათთვის ძალზედ მნიშვნელოვანია, ზვიად გამსახურდიას საქმიანობა, რომელიც საბოლოოდ საქართველოს დამოუკიდებლობით დაგვირგვინდა“, - აცხადებს დეპუტატი.

პარტია „ქართული ოცნების“ თავმჯდომარემ, ბიძინა ივანიშვილმა დღეს განაცხადა, რომ პირველი პრეზიდენტის დაღუპვის გარემოებები რომ დღემდე გამოუძიებელია, ჩვენი ქვეყნის დიდი სირცხვილია.